ചെറുവത്തൂര്‍: 'പുഞ്ചിരി' പലര്‍ക്കുമിന്നു വെറുമൊരു ബസല്ല. വേദനകളില്‍ മാഞ്ഞുപോയ പുഞ്ചിരി തിരികെയെത്തിക്കുന്ന കൈത്താങ്ങ് കൂടിയാണ്. പലവിധ രോഗങ്ങളാല്‍ വിഷമിക്കുന്നവര്‍ക്ക് കൈത്താങ്ങാവാന്‍ നിരവധി തവണ ഈ ബസില്‍ കാരുണ്യത്തിന്റെ ഡബിള്‍ബെല്‍ മുഴങ്ങി കഴിഞ്ഞു. ചീമേനി പെട്ടിക്കുണ്ട് സ്വദേശി സിദ്ധിഖിന്റെ ഉടമസ്ഥതയിലുള്ളതാണു ബസ്. ബസിന്റെ പേരു പോലെ തന്നെ ഇദ്ദേഹം ആഗ്രഹിക്കുന്നതും നിരാലംബരായവരുടെ പുഞ്ചിരികൂടിയാണ്. വിഷമതകള്‍ അറിയിച്ചാല്‍ അര്‍ഹതപെട്ടവര്‍ ആണെങ്കില്‍ അടുത്ത ദിവസത്തെ യാത്ര കാരുണ്യ യാത്രയായി മാറ്റിവയ്ക്കുന്നതാണു സിദ്ധിഖിന്റെ രീതി.
ഡീസലിന്റെയും ബസ് ജീവനക്കാരുടെയും പ്രതിഫലവും മാറ്റിനിര്‍ത്തി ബാക്കിയുള്ള മുഴുവന്‍ തുകയും അവര്‍ക്കു കൈമാറുകയാണു പതിവ്. ബസിലെ ജീവനക്കാരും അവരുടെ വേതനം കഷ്ടതയനുഭവിക്കുന്നവര്‍ക്കായി നല്‍കി കാരുണ്യയാത്രയില്‍ പങ്കാളികളാവാറുണ്ട്. ചെറുവത്തൂര്‍ കണ്ണങ്കൈയിലെ അഭിനവ്, ചാനടുക്കത്തെ ദിനേശന്‍, അഴിത്തലയിലെ ഇക്ബാല്‍ എന്നിവര്‍ക്ക് സഹായമെത്തിക്കാന്‍ അടുത്തിടെയാണ് 'പുഞ്ചിരി' കാരുണ്യവഴിയില്‍ ഓടിയത്. നാളെ കാരിയിലെ എ.കെ പ്രസാദിനു വേണ്ടി ചെറുവത്തൂര്‍ ഫെയ്‌സ് ബുക്ക് കൂട്ടായ്മയുമായി സഹകരിച്ച് പുഞ്ചിരിബസ് കാരുണ്യ യാത്ര നടത്തും.