ചെറുതുരുത്തി: പാഞ്ഞാള്‍ പൈങ്കുളത്ത് ബി.ജെ.പി നേതാവിന്റെ ഫര്‍ണിച്ചര്‍ ഷോറൂം കത്തിനശിച്ച നിലയില്‍ കണ്ടെത്തി.
ബി.ജെ.പി പാഞ്ഞാള്‍ പഞ്ചായത്ത് കമ്മിറ്റി പ്രസിഡന്റും, മുന്‍ പഞ്ചായത്ത് മെമ്പറുമായ രാധാകൃഷ്ണന്റെ ഉടമസ്ഥതയിലുള്ള ചെഞ്ചേരി ഫര്‍ണിച്ചര്‍ സ്ഥാപനമാണ് കത്തിയമര്‍ന്നത്.
ഇന്നലെ പുലര്‍ച്ചെ മൂന്നരയോടെ ഈ വഴിയിലൂടെ പോവുകയായിരുന്ന ഓട്ടോ ഡ്രൈവറാണ് സ്ഥാപനത്തിനുള്ളില്‍ നിന്ന് തീയും, പുകയും ഉയരുന്നത് കണ്ടത്.
ഷൊര്‍ണൂരില്‍ നിന്ന് എത്തിയ അഗ്നിശമന സേനയാണ് തീ അണച്ചത്. പെട്രോള്‍ ഒഴിച്ച് സ്ഥാപനത്തിന് തീ ഇടുകയായിരുന്നുവെന്ന് രാധാകൃഷ്ണന്‍ പൊലിസില്‍ നല്‍കിയ പരാതിയില്‍ പറയുന്നു. പത്ത് ലക്ഷം രൂപയുടെ നാശനഷ്ടം ഉണ്ടായതായതായി രാധാകൃഷ്ണന്‍ അറിയിച്ചു. പൊലിസ് അന്വേഷണം ആരംഭിച്ചു.