കൊച്ചി: നോര്‍ക്ക റൂട്ട്‌സ് ഡയരക്ടറും പ്രമുഖ വ്യവസായിയുമായ എം.എ യൂസഫലിയെ അയോഗ്യനാക്കിയ കേന്ദ്ര സര്‍ക്കാര്‍ നടപടിക്ക് ഹൈക്കോടതിയുടെ സ്‌റ്റേ. ഒരു മാസത്തേക്കാണ് സ്‌റ്റേ ചെയ്തിരിക്കുന്നത്. തന്നെ അയോഗ്യനാക്കിയതിനെതിരെ എം.എ യൂസഫലി സമര്‍പ്പിച്ച ഹരജിയിലാണ് നടപടി.

2013ലെ കമ്പനീസ് ആക്ടിലെ സെക്ഷന്‍ 164(2)എ പ്രകാരമാണ് നടപടി. ഇതുപ്രകാരം മൂന്നു വര്‍ഷം തുടര്‍ച്ചയായി ബാലന്‍സ് ഷീറ്റ്, ആദായനികുതി റിട്ടേണ്‍ എന്നിവ സമര്‍പ്പിക്കാത്ത കമ്പനികളെ കടലാസ് (ഷെല്‍ കമ്പനികള്‍) കമ്പനികളായാണ് പരിഗണിക്കുന്നത്. 2016 നവംബര്‍ ഒന്നുമുതല്‍ 2021 ഒക്ടോബര്‍ 31 വരെയാണ് ഈ കമ്പനികളുടെ ഉടമകളെ അയോഗ്യരാക്കിയത്.

നോര്‍ക്ക റൂട്‌സിന്റെ ഡയരക്ടര്‍മാരായ മുന്‍ മുഖ്യമന്ത്രി ഉമ്മന്‍ ചാണ്ടി, പ്രമുഖ വ്യവസായി എം.എ യുസഫലി, മുന്‍മന്ത്രി കെ.സി ജോസഫ്, ഡോ. ആസാദ് മൂപ്പന്‍ എന്നിവരടക്കം 10 ഡയരക്ടര്‍മാരെയും അയോഗ്യരാക്കിയിരുന്നു. നേരത്തെ, ആസാദ് മൂപ്പന്‍ ഹൈക്കോടതിയെ സമീപിക്കുകയും ഉത്തരവിന് സ്റ്റേ വാങ്ങിക്കുകയും ചെയ്തിരുന്നു.