ന്യൂയോര്‍ക്ക്: റാഖൈനിലെ റോഹിംഗ്യകള്‍ക്ക് യു.എന്നിന്റെ മേല്‍നോട്ടത്തില്‍ സുരക്ഷ ഒരുക്കണമെന്ന് ബംഗ്ലാദേശ് പ്രധാനമന്ത്രി ശൈഖ് ഹസീന. യു.എന്‍ പൊതുസഭയില്‍ സംസാരിക്കുകയായിരുന്നു അവര്‍. രാജ്യത്തേക്ക് മടങ്ങുന്ന റോഹിംഗ്യകളെ തടയാനായി മ്യാന്‍മര്‍ സര്‍ക്കാര്‍ കുഴിബോംബുകള്‍ വച്ചിരിക്കുകയാണ്. മ്യന്‍മറില്‍ നിന്ന് പലായനംചെയ്ത അഭയാര്‍ഥികള്‍ക്ക് തിരിച്ചുവരാന്‍ സുരക്ഷ ഒരുക്കണം.
റോഹിംഗ്യന്‍ ജനതയുടെ വംശഹത്യയാണ് മ്യന്‍മറില്‍ നടക്കുന്നത്. കഴിഞ്ഞ മൂന്നാഴ്ചക്കിടെ 4,30,000 അഭയാര്‍ഥികള്‍ ബംഗ്ലാദേശില്‍ എത്തി. 8,00,000 റോഹിംഗ്യകള്‍ക്ക് രാജ്യം ഇതുവരെ അഭയം ഒരുക്കി. റോഹിംഗ്യകളെ വംശഹത്യചെയ്യുന്നത് മ്യാന്‍മര്‍ സര്‍ക്കാര്‍ അവസാനിപ്പിക്കുമെന്നും അവര്‍ പറഞ്ഞു.റാഖൈനിലെ റോഹിംഗ്യന്‍ പ്രദേശങ്ങളില്‍ നിന്ന് ഭൂരിഭാഗം ആളുകളും രക്ഷതേടി അഭയാര്‍ഥി ക്യാംപുകളില്‍ എത്തിയിരിക്കുകയാണ്. ഇവര്‍ക്കാവശ്യമായ ഭക്ഷണമോ മറ്റു സൗകര്യങ്ങളോ ഈ ക്യാംപുകളിലില്ലെന്ന് അഭായാര്‍ഥികള്‍ക്കായുള്ള സംഘടനയായ ഇന്റര്‍നാഷനല്‍ ഓര്‍ഗനൈസേഷന്‍ ഫോര്‍ മൈഗ്രേഷന്‍ പറഞ്ഞു.