ദോഹ: നാളെ നടക്കുന്ന ഭരണഘടന ഭേദഗതിയുമായി ബന്ധപ്പെട്ട ഹിതപരിശോധനക്ക് എല്ലാം ഒരുക്കങ്ങളും പൂര്‍ത്തിയാക്കി ഖത്തര്‍. ഇതിന്റെ ഭാഗമായി രാജ്യത്തെ മുഴുവന്‍ സ്‌കൂളുകള്‍ക്കും വിദ്യാഭ്യാസ ഉന്നത വിദ്യാഭ്യാസ മന്ത്രാലയം അവധി പ്രഖ്യാപിച്ചു. രാജ്യത്തെ മുഴുവന്‍ പൗരന്മാരുടെയും പങ്കാളിത്തം ഹിതപരിശോധനയില്‍ ഉറപ്പുവരുത്താനായാണ് അവധി പ്രഖ്യാപനം.

സ്‌കൂളുകളിലെ അക്കാദമിക്, അഡ്മിനിസ്‌ട്രേറ്റീവ് സ്റ്റാഫ് ഉള്‍പ്പെടെ ഖത്തറിലെ എല്ലാ പൊതു, സ്വകാര്യ സ്‌കൂളുകള്‍ക്കും നാളെ അവധിയായിരിക്കുമെന്ന് വിദ്യാഭ്യാസ മന്ത്രാലയം സമൂഹ മാധ്യമത്തിലൂടെ അറിയിച്ചു. അതേസമയം യൂണിവേഴ്‌സിറ്റികള്‍ ഉള്‍പ്പെടെയുള്ള ഉന്നത വിദ്യാഭ്യസ സ്ഥാപനങ്ങള്‍ക്ക് ഇതുവരെ അവധി പ്രഖ്യാപിച്ചിട്ടില്ല.

നാളെ നടക്കുന്ന ഹിതപരിശോധന വിജയകരമായി പൂര്‍ത്തിയാക്കാന്‍ വിപുലമായ ഒരുക്കങ്ങളാണ് അമീര്‍ ശൈഖ് തമീം ബിന്‍ ഹമദ് ആല്‍ഥാനിയുടെ നിര്‍ദേശപ്രകാരം ജനറല്‍ റഫറണ്ടം കമ്മിറ്റിയുടെ നേതൃത്വത്തില്‍ നടത്തിയത്. രാജ്യത്തിന്റെ വിവിധ ഭാഗങ്ങളിലായി പേപ്പര്‍ വോട്ടിങ്ങിന് പത്തുകേന്ദ്രങ്ങളും, ഇലക്ട്രോണിക് വോട്ടിങ്ങിന് 18 കേന്ദ്രങ്ങളും ഒരുക്കിയിട്ടുണ്ടെന്ന് അധികൃതര്‍ അറിയിച്ചു.

നാളെ രാവിലെ ഏഴ് മുതല്‍ രാത്രി ഏഴുവരെ നീളുന്ന ഹിതപരിശോധനയില്‍ രാജ്യത്തിനകത്തും പുറത്തുമുള്ള മുഴുവന്‍ പൗരന്മാരും പങ്കെടുക്കണമെന്ന് റഫറണ്ടം കമ്മിറ്റി അഭ്യര്‍ഥിച്ചു. പോളിങ് സ്‌റ്റേഷനില്‍ എത്തി വോട്ട് ചെയ്യുന്നതിനു പുറമെ മെട്രാഷ് ഉപയോഗിച്ച് ഓണ്‍ലൈന്‍ വഴി വോട്ട് രേഖപ്പെടുത്താനും സൗകര്യമൊരുക്കിയിട്ടുണ്ട്. പോളിങ് സ്‌റ്റേഷനുകളിലെത്തി പേപ്പര്‍, ഇലക്ട്രോണിക് സൗകര്യങ്ങളിലൂടെയാണ് വോട്ട് ചെയ്യാന്‍ കഴിയുന്നത്.

ഖത്തര്‍ ഐഡിയോ ഡിജിറ്റല്‍ ഐഡിയോ ഹിതപരിശോധനക്ക് തിരിച്ചറിയല്‍ രേഖയായി ഉപയോഗിച്ച് വോട്ട് രേഖപ്പെടുത്താം. 'മെട്രാഷ് ടു' ആപ് ഉപയോഗിച്ചും വോട്ടു ചെയ്യാനുള്ള സൗകര്യവുമുണ്ട്. കൂടാതെ, ആശുപത്രികളില്‍ കഴിയുന്നവര്‍ക്കും രോഗികള്‍ക്കും മൊബൈല്‍ വോട്ടിങ് സൗകര്യവും ഏര്‍പ്പെടുത്തിയിട്ടുണ്ട്. വോട്ടെടുപ്പിന്റെ തയാറെടുപ്പുകള്‍ ജനറല്‍ റഫറണ്ടം കമ്മിറ്റി ചെയര്‍മാനും ആഭ്യന്തര മന്ത്രിയുമായ ഷെയ്ഖ് ഖലീഫ ബിന്‍ ഹമദ് ബിന്‍ ഖലീഫ ആല്‍ത്താനി വിലയിരുത്തി. ഹിതപരിശോധന അവസാനിച്ച് 24 മണിക്കൂറിനുള്ളില്‍ തന്നെ ഫലങ്ങള്‍ പ്രഖ്യാപിക്കാനാകുമെന്ന് പ്രതീക്ഷിക്കുന്നതായി ജനറല്‍ റഫറണ്ടം കമ്മിറ്റി വ്യക്തമാക്കി.

കൂടൂതൽ ​ഗൾഫ് വാർത്തകളറിയാൻ ഈ ഗ്രൂപ്പിൽ ജോയിൻ ചെയ്യുക

Due to voting, Qatar has declared a nationwide holiday for all schools