തൃശൂര്‍: അഴിക്കോടന്‍ ദിനത്തോടനുബന്ധിച്ച് 3.30 മുതല്‍ നഗരത്തിലും പരിസരപ്രദേശങ്ങളിലും ഗതാഗത നിയന്ത്രണം ഏര്‍പ്പെടുത്തി. വിവിധ റൂട്ടുകളില്‍ നിന്നുള്ള ബസുകളുടെ സര്‍വീസ് നഗര പരിധിയില്‍ ഇന്ന് വ്യത്യാസപ്പെടും. സ്വരാജ് റൗണ്ടിലും സമീപ റോഡുകളിലും ഉച്ച മുതല്‍ പാര്‍ക്കിങ് നിരോധിച്ചിട്ടുണ്ട്.
പാലക്കാട്-പീച്ചി ബസുകള്‍ പുളിക്കന്‍ മാര്‍ക്കറ്റ് സെന്ററില്‍ നിന്ന് ഇടത്തോട്ട് തിരിഞ്ഞ് മിഷന്‍ ആശുപത്രി മുന്‍വശം-ഇക്കണ്ട വാരിയര്‍ റോഡ് വഴി ശക്തന്‍ സ്റ്റാന്‍ഡിലെത്തും. തിരികേ മിഷന്‍ ക്വാര്‍ട്ടേര്‍ഴ്‌സ്-കാട്ടൂക്കാരന്‍ ജങ്ഷന്‍, ഫാത്തിമനഗര്‍ ജങ്ഷന്‍ വഴി സര്‍വീസ് നടത്തണം. മാന്ദാമംഗലം, പുത്തൂര്‍, വലക്കാവ് ബസുകളും ഇതേ വഴിയിലൂടെ സര്‍വീസ് നടത്തും. മണ്ണുത്തി, മുക്കാട്ടുകര, നെല്ലങ്കര ബസുകള്‍ കിഴക്കേക്കോട്ടയില്‍ നിന്നു തിരിഞ്ഞ് ചെമ്പൂക്കാവ് ജങ്ഷന്‍-അശ്വനി ജങ്ഷന്‍ വഴി വടക്കേ സ്റ്റാന്‍ഡിലെത്തി ഇന്‍ഡോര്‍ സ്‌റ്റേഡിയം ജങ്ഷന്‍ വഴി തിരികെ സര്‍വീസ് നടത്തും.
ചേലക്കര, വടക്കാഞ്ചേരി, ഒറ്റപ്പാലം, പഴയന്നൂര്‍, തിരുവില്വാമല, മെഡിക്കല്‍ കോളജ്, അത്താണി, കൊട്ടേക്കാട് ബസുകള്‍ പെരിങ്ങാവ്-കോലോത്തുംപാടം-അശ്വനി ജങ്ഷന്‍ വഴി വടക്കേസ്റ്റാന്‍ഡിലെത്തി സാധാരണ റൂട്ടിലൂടെ തിരികെപോകും.
കുന്ദംകുളം, കോഴിക്കോട്, ഗുരുവായൂര്‍, അടാട്ട് തുടങ്ങി പൂങ്കുന്നം വഴിയുള്ള എല്ലാ ബസുകളും പൂങ്കുന്നത്ത് സര്‍വീസ് അവസാനിപ്പിച്ച് അയ്യന്തോള്‍ സിവില്‍ ലൈന്‍, അയ്യന്തോള്‍ ഗ്രൗണ്ട്, ലുലു ജങ്ഷന്‍ വഴി തിരികേ പോകണം. പടിഞ്ഞാറേ കോട്ട വഴി വരുന്ന വാടാനപ്പിള്ളി, അന്തിക്കാട്, കാഞ്ഞാണി ബസുകള്‍ നേതാജി ഗ്രൗണ്ട് പരിസരത്ത് സര്‍വീസ് അവസാനിപ്പിച്ച് പടിഞ്ഞാറേ കോട്ട വഴി തിരികേ പോകും.
കൊടുങ്ങല്ലൂര്‍, ഇരിങ്ങാലക്കുട, തൃപ്രയാര്‍, ചേര്‍പ്പ് തുടങ്ങി കൂര്‍ക്കഞ്ചേരി വഴി വരുന്ന എല്ലാ ബസുകളും ബാല്യ ജങ്ഷന്‍ നിന്ന് തിരിഞ്ഞ് ശക്തന്‍ സ്റ്റാന്‍ഡിലെത്തി തിരികേ കണ്ണംകുളങ്ങര, ചിയ്യാരം, കൂര്‍ക്കഞ്ചേരി വഴി സര്‍വീസ് നടത്തും.
കൊടുങ്ങല്ലൂര്‍ ഭാഗത്തുനിന്ന് കൂര്‍ക്കഞ്ചേരി-വെസ്റ്റ് ഫോര്‍ട്ട് വഴി പോകേണ്ട ചെറുവാഹനങ്ങള്‍ കുര്‍ക്കഞ്ചേരിയില്‍ നിന്ന് ഇടത്തേക്കു തിരിഞ്ഞ് വടൂക്കര അരണാട്ടുകര വഴി പോകണം. മണ്ണുത്തി ഭാഗത്തേക്ക് പോകേണ്ട വാഹനങ്ങള്‍ക്ക് കൂര്‍ക്കഞ്ചേരിയില്‍ നിന്ന് വലത്തോട്ട് തിരിഞ്ഞ് ചിയ്യാരം വഴി പോകാം.