തൃശൂര്‍: കൊക്കാലെ ടി.ബി.റോഡിലുള്ള ഹോട്ടല്‍ കാസിനോയില്‍ തീപ്പിടിത്തം ആളപായമില്ല. വൈകിട്ട് അഞ്ചേകാലോടെയാണ് തീപ്പിടിത്തം നടന്നത്. ഹോട്ടലിലെ പഴയ ബ്ലോക്കില്‍ മൂന്നാം നിലയിലെ ആള്‍പ്പാര്‍പ്പില്ലാത്ത മുറിയിലാണ് തീപ്പിടിത്തമുണ്ടായത്.
കാരണം വ്യക്തമല്ല. പഴയ ഫര്‍ണിച്ചറുകളും ഉപയോഗശൂന്യമായ കിടയ്ക്കകളും സൂക്ഷിച്ച മുറിയായിരുന്നു ഇത്.
വിവരമറിഞ്ഞ് തൃശൂര്‍ അഗ്‌നിശമന വിഭാഗം യൂനിറ്റിലെ മുഴുവന്‍ വാഹനങ്ങളും ജീവനക്കാരും എത്തിയിരുന്നു. ഹോട്ടലിലെ മുഴുവന്‍ താമസക്കാരെയും സുരക്ഷിതമായി പുറത്തേക്ക് മാറ്റിയശേഷം മൂന്നാം നിലയിലെ ജനന്‍ചില്ല് പൊളിച്ചാണ് അഗ്‌നിശമന സേനാംഗങ്ങള്‍ തീയണച്ചത്. കനത്ത പുക തീയണക്കുന്നത് തടസം സൃഷ്ടിച്ചു.
ഒന്നര മണിക്കൂറോളമെടുത്താണ് തീയണച്ചത്. സ്റ്റേഷന്‍ ഒഫിസര്‍ എ.എന്‍ ലാസറിന്റെ നേതൃത്വത്തില്‍ അസി.സ്റ്റേഷന്‍ ഓഫിസര്‍ ബാബു,ബല്‍റാം ബാബു, ആനില്‍കുമാര്‍, പോള്‍ ഡേവിഡ്, ഫയര്‍മാന്‍മാരായ ലൈജു, ജോണ്‍ ബ്രിട്ടോ, ഷിജി, സന്തോഷ്, അരുണ്‍ജിത്ത്, രഞ്ചിത്ത് പാപ്പച്ചന്‍, അജു എന്നിവരാണ് തീയണച്ചത്.