ശ്രീനഗര്‍: കശ്മിരില്‍ സുരക്ഷാ സേനയുമായുണ്ടായ ഏറ്റുമുട്ടലില്‍ മൂന്ന് ഭീകരര്‍ കൊല്ലപ്പെട്ടു. അതിര്‍ത്തിയില്‍ ബാരാമുള്ള ജില്ലയിലെ ഉറി മേഖലയിലാണ് ഏറ്റുമുട്ടലുണ്ടായത്. ഇന്നലെ രാവിലെയാണ് ഏറ്റുമുട്ടലുണ്ടായതെന്ന് പൊലിസ് അറിയിച്ചു.
കൊല്ലപ്പെട്ട ഭീകരര്‍ ലഷ്‌കറെ ത്വയ്ബ സംഘടനയിലുള്ളവരാണെന്നാണ് പ്രാഥമികാന്വേഷണത്തില്‍ വ്യക്തമായതെന്ന് പൊലിസ് അറിയിച്ചു. ശനിയാഴ്ച രാത്രിയില്‍തന്നെ ഭീകരരുടെ സാന്നിധ്യം തിരിച്ചറിഞ്ഞിരുന്നു. തുടര്‍ന്ന് പ്രദേശം വളഞ്ഞ സൈന്യത്തെ ഭീകരര്‍ ശക്തമായി പ്രതിരോധിച്ചതോടെയാണ് ഏറ്റുമുട്ടലുണ്ടായത്. ഗ്രാമീണരെ മറയാക്കിയാണ് ഭീകരര്‍ സൈന്യത്തിനുനേരെ ആക്രമണം നടത്തിയത്. ഇതെതുടര്‍ന്ന് പ്രദേശത്തു നിന്ന് ഗ്രാമീണരെ ഒഴിപ്പിച്ചാണ് ഭീകരര്‍ക്കായി നടപടികള്‍ തുടങ്ങിയത്.
അതിനിടയില്‍ ബാരാമുള്ള ജില്ലയില്‍ സോപോര്‍ ചൗക്കില്‍ സൈനിക വാഹനത്തിനുനേരെ ഭീകരര്‍ നടത്തിയ ആക്രമണത്തില്‍ മൂന്ന് സുരക്ഷാ സൈനികര്‍ക്ക് പരുക്കേറ്റു. രണ്ട് പൊലിസുകാര്‍ക്കും ഒരു സി.ആര്‍.പി.എഫ് ജവാനുമാണ് പരുക്കേറ്റത്. സൈനിക വാഹനത്തിനുനേരെ ഭീകരര്‍ ഗ്രനേഡ് ആക്രമണം നടത്തുകയായിരുന്നു.
കഴിഞ്ഞ വര്‍ഷം സെപ്റ്റംബറില്‍ ഉറിയിലെ സൈനിക ക്യാംപിനുനേരെ നാല് ഭീകരര്‍ നടത്തിയ ആക്രമണത്തില്‍ 19 സൈനികരാണ് കൊല്ലപ്പെട്ടിരുന്നത്.