വെല്ലിങ്ടന്‍: അടുത്ത മാസം ഇന്ത്യയിലെത്തുന്ന ന്യൂസിലന്‍ഡ് ക്രിക്കറ്റ് ടീമിനെ പ്രഖ്യാപിച്ചു. 15 അംഗ ടീമില്‍ ഒന്‍പത് താരങ്ങളെയാണ് ഇപ്പോള്‍ തിരഞ്ഞെടുത്തിരിക്കുന്നത്. ആറ് താരങ്ങളെ നിലവില്‍ ഇന്ത്യയില്‍ പര്യടനം നടത്തുന്ന എ ടീമില്‍ നിന്ന് തിരഞ്ഞെടുക്കുമെന്ന് കോച്ച് മൈക് ഹെസ്സന്‍ വ്യക്തമാക്കി. പര്യടനത്തിനുള്ള ടീമില്‍ നിന്ന് ജിമ്മി നീഷം, നെയ്ല്‍ ബ്രൂം എന്നിവരെ ഒഴിവാക്കി.
കെയ്ന്‍ വില്ല്യംസന്‍, ട്രെന്റ് ബോള്‍ട്ട്, കോളിന്‍ ഡി ഗ്രാന്‍ഡ്‌ഹോം, മാര്‍ടിന്‍ ഗുപ്റ്റില്‍, ടോം ലാതം, ആദം മില്‍നെ, മിച്ചല്‍ സന്റ്‌നര്‍, ടിം സൗത്തി, റോസ് ടെയ്‌ലര്‍ എന്നിവരാണ് ടീമിലുള്ളത്.
മൂന്ന് മത്സരങ്ങളടങ്ങിയ ഏകദിന, ടി20 പരമ്പരകളാണ് ന്യൂസിലന്‍ഡ് ഇന്ത്യയില്‍ കളിക്കുന്നത്. ഒക്ടോബര്‍ 22ന് മുംബൈയിലാണ് ആദ്യ ഏകദിനം. നവംബര്‍ ഏഴിന് നടക്കുന്ന അവസാന ടി20 പരമ്പര തിരുവനന്തപുരം ഗ്രീന്‍ഫീല്‍ സ്റ്റേഡിയത്തിലാണ് അരങ്ങേറുന്നത്. ഈയടുത്ത് അംഗീകാരം ലഭിച്ച സ്റ്റേഡിയത്തിലെ ആദ്യ അന്താരാഷ്ട്ര ക്രിക്കറ്റ് പോരാട്ടം കൂടിയാണിത്.