ന്യൂഡല്‍ഹി: മലേഗാവ് സ്‌ഫോടനക്കേസിലെ പ്രതികളിലൊരാളായ റിട്ട. മേജര്‍ രമേശ് ഉപാധ്യായയെ ബോംബെ ഹൈക്കോടതി ജാമ്യത്തില്‍ വിട്ടു. മാനുഷിക പരിഗണന മുന്‍നിര്‍ത്തിയാണ് ജസ്റ്റിസുമാരായ രഞ്ജിത് മൊറെ, സധ്‌ന ജാദവ് എന്നിവരടങ്ങിയ ബെഞ്ച് രമേശിന് ജാമ്യം നല്‍കിയത്.
സൈനിക ഉദ്യോഗസ്ഥരായ രമേശും മറ്റൊരു പ്രതിയായ ശ്രീകാന്ത് പുരോഹിതും തമ്മില്‍ നടത്തിയ ഫോണ്‍സംഭാഷണങ്ങളാണ് കേസില്‍ ഇരുവര്‍ക്കുമെതിരായ പ്രധാന തെളിവുകള്‍. ഒരുലക്ഷം രൂപയുടെ ജാമ്യത്തിലാണ് ഇയാളെ വിട്ടയച്ചത്. ഉത്തര്‍പ്രദേശ് തെരഞ്ഞെടുപ്പില്‍ മത്സരിക്കാന്‍ കോടതി ഈ വര്‍ഷമാദ്യം രമേശിന് അനുമി നല്‍കിയിരുന്നു. എന്നാല്‍ അദ്ദേഹം മത്സരിച്ചിരുന്നില്ല.
കേസില്‍ സുധാകര്‍ ചതുര്‍വേദി, സുധാകര്‍ ദ്വിവേദി എന്ന ശങ്കരാചാര്യ എന്നിവര്‍ക്കു കഴിഞ്ഞ ആഴ്ച ജാമ്യം ലഭിച്ചിരുന്നു. കേസിലെ പ്രധാനപ്രതികളായ സനാതന്‍ സന്‍സ്ഥ സ്ഥാപക സാധ്വി പ്രഗ്യാസിങ്ങിന് നേരത്തെ ജാമ്യംലഭിച്ചിരുന്നു. പുരോഹിതിന് കഴിഞ്ഞമാസവും പ്രഗ്യാസിങ്ങിന് ഈ വര്‍ഷമാദ്യവുമാണ് ജാമ്യംലഭിച്ചത്. 2008 സെപ്റ്റംബര്‍ 29നുണ്ടായ സ്‌ഫോടനത്തില്‍ ആറുപേര്‍ മരിക്കുകയും നൂറിലേറെ പേര്‍ക്കു പരുക്കേല്‍ക്കുകയും ചെയ്തിരുന്നു. കേസുമായി ബന്ധപ്പെട്ട് സംഘ്പരിവാര്‍ സംഘടനകളില്‍പ്പെട്ട 12 പേരെയാണ് പിടികൂടിയിരുന്നത്.