ധാക്ക: മ്യാന്മറില്‍നിന്ന് ബംഗ്ലാദേശിലേക്കു പലായനം ചെയ്ത റോഹിംഗ്യാ മുസ്‌ലിംകള്‍ സഞ്ചരിച്ച ബോട്ട് അപകടത്തില്‍പെട്ട് 15 പേര്‍ മരിച്ചു. ബംഗ്ലാദേശിലെ കോക്‌സ് ബസാറിലെ ഇനാനി ബീച്ചില്‍നിന്ന് എട്ടു കിലോമീറ്റര്‍ അകലെയായിരുന്നു അപകടമുണ്ടായത്.
ഇന്നലെ വൈകിട്ട് 5.30നാണു സംഭവം. തീരത്തോട് അടുക്കവെ അവ്യക്തമായ വസ്തുവില്‍ തട്ടി മറിഞ്ഞ ബോട്ട് രണ്ടു ഭാഗമായി പിളരുകയായിരുന്നു. മരിച്ചവരില്‍ പത്തുപേര്‍ കുട്ടികളും നാലുപേര്‍ സ്ത്രീകളുമാണ്.
ബോട്ടില്‍ 100ഓളം പേരുണ്ടായിരുന്നതായി പൊലിസ് ഇന്‍സ്‌പെക്ടര്‍ മുഹമ്മദ് കൈ കിസ്‌ലു പറഞ്ഞു. 17 പേരെ രക്ഷപ്പെടുത്തിയിട്ടുണ്ട്. മരണസംഖ്യ ഇനിയും ഉയരാനിടയുണ്ടെന്ന് അദ്ദേഹം അറിയിച്ചു.
കഴിഞ്ഞ 48 മണിക്കൂറിനിടെ 2,000ത്തോളം റോഹിംഗ്യാ മുസ്‌ലിംകള്‍ ബോട്ടുകളില്‍ ബംഗ്ലാദേശിലെത്തിയതായി യു.എന്‍ അഭയാര്‍ഥി ഏജന്‍സി അറിയിച്ചു.