ക്വിറ്റോ: ഒടുവില്‍ ലയണല്‍ മെസ്സിയെന്ന ഫുട്‌ബോള്‍ മിശിഹ തന്റെ മാന്ത്രികതയുടെ കെട്ട് ഒരിക്കല്‍ കൂടി പൊട്ടിച്ചപ്പോള്‍ 57 വര്‍ഷമായി വിജയം വഴങ്ങാതിരുന്ന ക്വിറ്റോയിലെ സ്റ്റേഡിയത്തില്‍ അര്‍ജന്റീനയുടെ വെള്ളയും ഇളം നീലയും കലര്‍ന്ന നിറങ്ങള്‍ പെയ്തിറങ്ങി. അതെ, അര്‍ജന്റീന 2018ലെ റഷ്യന്‍ ലോകകപ്പ് കളിക്കും. ലോകകപ്പ് യോഗ്യത തന്നെ ത്രിശങ്കുവിലായി ഇക്വഡോറിനെതിരായ ജീവന്‍മരണ പോരാട്ടത്തിനിറങ്ങിയ അര്‍ജന്റീന സൂപ്പര്‍ താരം മെസ്സിയുടെ ഹാട്രിക്ക് ഗോള്‍ മികവില്‍ ഒന്നിനെതിരേ മൂന്ന് ഗോളുകള്‍ക്ക് ഉജ്ജ്വല വിജയം സ്വന്തമാക്കിയാണ് മൂന്നാം സ്ഥാനക്കാരായി ലോകകപ്പ് ടിക്കറ്റ് ഉറപ്പാക്കിയത്.
ഫുട്‌ബോള്‍ ആനന്ദിക്കാന്‍ മാത്രമുള്ളതല്ല അത് ഒരു രാജ്യത്തിന്റെ അഭിമാനം സംരക്ഷിക്കാനുള്ളത് കൂടിയാണെന്ന കോച്ച് ജോര്‍ജ് സംപോളിയുടെ വാക്കുകള്‍ ആവാഹിച്ച് അര്‍ജന്റീന താരങ്ങള്‍ കളം നിറഞ്ഞ് കളിച്ച് ലോകമെമ്പാടുമുള്ള ഫുട്‌ബോള്‍ പ്രേമികളുടെ മനം നിറച്ചാണ് റഷ്യയിലേക്ക് വരുന്നത്. ലയണല്‍ മെസ്സിയുടെ എണ്ണം പറഞ്ഞ ഗോളുകളാണ് ഒരു ഗോള്‍ വഴങ്ങിയ ശേഷമുള്ള അര്‍ജന്റീനയുടെ തിരിച്ചുവരവിലൂടെയുള്ള മൂന്ന് ഗോള്‍ വിജയത്തിന്റെ കാതല്‍.
ലാറ്റിനമേരിക്കന്‍-യൂറോപ്യന്‍ യോഗ്യതാ പോരാട്ടങ്ങളില്‍ മുന്‍നിര ടീമുകളെല്ലാം ജയം കണ്ടിട്ടുണ്ട്. ബ്രസീല്‍ എതിരില്ലാത്ത മൂന്ന് ഗോളിന് ചിലിയെയും ഉറുഗ്വെ രണ്ടിനെതിരേ നാല് ഗോളുകള്‍ക്ക് ബൊളീവിയയെയും പോര്‍ച്ചുഗല്‍ എതിരില്ലാത്ത രണ്ട് ഗോളിന് സ്വിറ്റ്‌സര്‍ലന്‍ഡിനെയും ഹോളണ്ട് എതിരില്ലാത്ത രണ്ട് ഗോളിന് സ്വീഡനെയും ഫ്രാന്‍സ് ഒന്നിനെതിരേ രണ്ട് ഗോളുകള്‍ക്ക് ബെലാറസിനെയും ബെല്‍ജിയം എതിരില്ലാത്ത നാല് ഗോളിന് സൈപ്രസിനെയും പരാജയപ്പെടുത്തി.