തിരുവനന്തപുരം: വക്കം ഷെബീര്‍ വധക്കേസിലെ പ്രതികള്‍ക്ക് എട്ട് വര്‍ഷം കഠിന തടവും ഒരു ലക്ഷം രൂപ വീതം പിഴയും ശിക്ഷ. കേസിലെ ഒന്നു മുതല്‍ നാല് വരെയുള്ള പ്രതികളായ സതീഷ്, സന്തോഷ്, ഉണ്ണിക്കുട്ടന്‍ എന്ന വിനായക്, വാവ എന്ന കിരണ്‍കുമാര്‍ എന്നിവരെയാണ് ശിക്ഷിച്ചത്. മനഃപൂര്‍വമല്ലാത്ത നരഹത്യ, മാരകായുധം ഉപയോഗിക്കല്‍, തെളിവ് നശിപ്പിക്കല്‍ എന്നീ ഇന്ത്യന്‍ ശിക്ഷാ നിയമത്തിലെ വകുപ്പുകള്‍ പ്രകാരമാണ് തിരുവനന്തപുരം പ്രിന്‍സിപ്പല്‍ സെഷന്‍സ് ജഡ്ജി ഹരിപാല്‍ ശിക്ഷ വിധിച്ചത്. കേസിലെ ആറാം പ്രതി നിതിന്‍ എന്ന മോനുക്കുട്ടനെ തെളിവുകളുടെ അഭാവത്തില്‍ വെറുതെ വിട്ടു. കേസിലെ അഞ്ചാം പ്രതി രാജു ആത്മഹത്യ ചെയ്തിരുന്നു.
2016 ജനുവരി 31ന് നിലയ്ക്കാമുക്ക് ഭാഗത്തുനിന്ന് വക്കത്തേക്ക് ബൈക്കില്‍ വന്ന ഷെബീറിനെയും സുഹൃത്ത് ഉണ്ണികൃഷണനെയും തോപ്പിക്കവിളാകം റെയില്‍വേ ഗേറ്റിന് സമീപത്ത് വച്ച് നാലംഗ സംഘം തടയുകയും കാറ്റാടി മരത്തിന്റെ വടി ഉപയോഗിച്ച് ഷെബീറിനെ അടിച്ചു കൊന്നെന്നുമാണ് കേസ്. സംഭവം മൊബൈലില്‍ പകര്‍ത്തിയ വിഡിയോ ദൃശ്യമാണ് പ്രതികളെ വേഗത്തില്‍ തിരിച്ചറിയാന്‍ പൊലിസിനെ സഹായിച്ചത്. പുത്തന്‍നട ദേവീ ക്ഷേത്രത്തിലെ ഉത്സവ സമയത്ത് എഴുന്നള്ളത്തിന് എത്തിച്ച ആനയുടെ വാലില്‍ തൂങ്ങി ചിലര്‍ ആടിയിരുന്നു. ഇതിനെ തുടര്‍ന്ന് വിരണ്ട ആന കായലില്‍ ചാടി. ഈ കേസിലെ പ്രതികള്‍ക്കെതിരേ ഷെബീര്‍ മൊഴി നല്‍കിയിരുന്നു. ഇതിന്റെ വൈരാഗ്യത്തിനായിരുന്നു കൊലനടത്തിയത്.
പിഴത്തുക മരണപ്പെട്ട ഷെബീറിന്റെ മാതാവ് നസീമയക്ക് നല്‍കാനും ഉത്തരവിലുണ്ട്. നീതി ലഭിച്ചിട്ടില്ലെന്നും, ഹൈക്കോടതിയെ സമീപിക്കുമെന്നും കൊല്ലപ്പെട്ട ഷെബീറിന്റെ കുടുംബം പ്രതികരിച്ചു.കേസിന്റെ വിചാരണ ആറ് മാസം കൊണ്ടാണ് പൂര്‍ത്തിയാക്കിയത്. കെല്ലപ്പെട്ട ഷെബീറിന്റെ പ്രായം കണക്കിലെടുത്ത് പരമാവധി ശിക്ഷ നല്‍കണമെന്ന് പ്രോസിക്യൂഷന്‍ വാദിച്ചു. കേസില്‍ 43 സാക്ഷികളെയും, 74 രേഖകളും കോടതി വിചാരണ വേളയില്‍ പരിഗണിച്ചു.