ബംഗളൂരു: ബംഗളൂരു സിറ്റിക്കു സമീപം എജിപുരയില്‍ ഇരുനില വീടു തകര്‍ന്ന് ഏഴു മരണം. ഗ്യാസ് സിലിണ്ടര്‍ പൊട്ടിത്തെറിച്ചാണ് അപകടമുണ്ടായതെന്ന് സംശയിക്കുന്നതായി പൊലിസ് പറഞ്ഞു. നിരവധി പേര്‍ കെട്ടിടത്തിനുള്ളില്‍ കുടുങ്ങിക്കിടക്കുന്നതായാണ് റിപ്പോര്‍ട്ട്.

ഇന്ന് രാവിലെ ഏഴു മണിയോടെയാണ് അപകടമുണ്ടായതെന്ന് ദൃക്‌സാക്ഷികള്‍ പറഞ്ഞു. ശക്തമായ ഒരു സ്‌ഫോടന ശബ്ദത്തോടൊപ്പം വീട് തകര്‍ന്നു വീഴുകയായിരുന്നെന്ന് ദൃക്‌സാക്ഷികള്‍ പറയുന്നു. വീടിന് 20 വര്‍ഷം പഴക്കമാണുള്ളത്.

അപകടത്തില്‍ നിന്ന് രണ്ടു കുട്ടികളെ രക്ഷപ്പെടുത്തി. താഴത്തെ നിലയില്‍ രണ്ടും മുകളിലത്തെ നിലയില്‍ ഒരു കുടുംബവുമാണ് താമസിച്ചിരുന്നത്. എത്രയാളുകളാണ് വീടിനുള്ളില്‍ ഉണ്ടായിരുന്നതെന്ന് കൃത്യമായ വിവരം ലഭിച്ചിട്ടില്ല.