വരാക്കര: കാല്‍തെറ്റി കിണറ്റിലേയ്ക്ക് വീണ രണ്ടു വയസ്സുകാരന്‍ ആല്‍ബിന് പോളിടെക്‌നിക് വിദ്യാര്‍ഥി രഞ്ജിത്ത് രക്ഷപ്പെടുത്തി. വരാക്കര പേര്‍ഷ്യന്‍ കുന്നില്‍ വീട്ടുമുറ്റത്ത് കളിച്ചുകൊണ്ടിരുന്ന ചെരടായി സജിയുടേയും റിനിയുടേയും മകനായ ആല്‍ബിയാണ് വീട്ടുകിണറില്‍ വീണത്. ബുധനാഴ്ച വൈകുന്നേരം അഞ്ചരയോടെയായിരുന്നു സംഭവം.ആല്‍ബിന്‍ സഹോദരന്‍ അഞ്ച് വയസുകാരന്‍ ആബേലിനൊപ്പം വീട്ടുമുറ്റത്ത് കളിക്കുകയായിരുന്നു.

എന്തോ ശബ്ദം കേട്ട് വീട്ടിലുണ്ടായിരുന്ന റിനി വന്ന് നോക്കിയപ്പോഴാണ് ആല്‍ബി കിണറ്റില്‍ വീണ് കിടക്കുന്നത് കണ്ടത്. ഇരുപത്തിയഞ്ച് അടിയിലധികം താഴ്ചയില്‍ വെള്ളത്തില്‍ പമ്പ് സെറ്റിന്റെ ഫുട് വാല്‍വിലേക്ക് കെട്ടിയിരുന്ന ചെറിയ പ്ലാസ്റ്റിക് കയറില്‍ പിടിച്ച് കിടക്കുകയായിരുന്നു കുട്ടി. റിനിയുടെ നിലവിളി കേട്ട് അയല്‍വാസിയായ ചിരമ്പന്‍ ജോണ്‍സന്റെ മകന്‍ രഞ്ജിത്ത് ഓടിയെത്തുകയായിരുന്നു.

നീണ്ട പ്ലാസ്റ്റിക് കയര്‍ തുടിക്കാലില്‍ കെട്ടി, രഞ്ജിത്ത് കിണറ്റിലേയ്ക്കിറങ്ങി.

പ്ലാസ്റ്റിക് കയറില്‍ തൂങ്ങി കിണറ്റിലേക്കിറങ്ങുമ്പോള്‍ കൈവെള്ളയില്‍ കയറുരഞ്ഞ് ചോര വന്നപ്പോള്‍ കയറിലെ പിടിവിട്ട് രഞ്ജിത്ത് കിണറ്റിലേയ്ക്ക് ചാടി വെള്ളത്തില്‍ കിടന്ന കുട്ടിയെ ചേര്‍ത്ത് പിടിച്ച് കയറില്‍ തൂങ്ങി കിടക്കുകയായിരുന്നു. പതിനൊന്ന് കോല്‍ താഴ്ചയുള്ള കിണറില്‍ നിലയില്ലാത്ത വെള്ളമുണ്ടായിരുന്നു.

തുടര്‍ന്ന് വീട്ടുകാര്‍ കയറില്‍ കെട്ടിയിറക്കിയ കസേരയിലിരുത്തി ആല്‍ബിയെ പുതുജീവിതത്തിലേക്ക് രഞ്ജിത്ത് കൈപിടിച്ചു കയറ്റി. അട്ടപ്പാടിയില്‍ പോളിടെക്‌നിക് അവസാന വര്‍ഷ വിദ്യാര്‍ഥിയായ രഞ്ജിത്ത് അവധിക്ക് വീട്ടിലെത്തിയതാണ്.