ജോഹര്‍ ബഹ്‌റു: സുല്‍ത്താന്‍ ഓഫ് ജോഹര്‍ കപ്പ് ഹോക്കി പോരാട്ടത്തില്‍ ഇന്ത്യന്‍ ജൂനിയര്‍ ടീമിന്റെ ഗോളടി മേളം. അമേരിക്കയെ ഇന്ത്യന്‍ കുട്ടികള്‍ മുക്കിയത് 22 ഗോളുകള്‍ക്ക്! തലങ്ങും വിലങ്ങും ഗോളടിച്ച് കൂട്ടി ഇന്ത്യന്‍ താരങ്ങള്‍ കളം നിറഞ്ഞപ്പോള്‍ അമേരിക്കന്‍ ടീം നിസഹായര്‍. ജോഹര്‍ കപ്പില്‍ ഇന്ത്യ സ്വന്തമാക്കുന്ന തുടര്‍ച്ചയായ മൂന്നാം വിജയമാണിത്. നേരത്തെ ആദ്യ മത്സരത്തില്‍ ഇന്ത്യ 3-2ന് ജപ്പാനേയും രണ്ടാം മത്സരത്തില്‍ ആതിഥേയരായ മലേഷ്യയെ 2-1നും പരാജയപ്പെടുത്തിയിരുന്നു. ഇന്ന് നടക്കുന്ന പോരാട്ടത്തില്‍ ഇന്ത്യ ആസ്‌ത്രേലിയയുമായി ഏറ്റുമുട്ടും. ടൂര്‍ണമെന്റിലെ അവസാന മത്സരത്തില്‍ ശനിയാഴ്ച ബ്രിട്ടനുമായും ഇന്ത്യ ഏറ്റുമുട്ടും. 

ടീമിലെ പത്ത് താരങ്ങള്‍ ഗോള്‍ നേടുന്നതില്‍ മത്സരിക്കുന്ന കാഴ്ചയായിരുന്നു. ഹര്‍മന്‍ജീത് സിങ് അഞ്ച് ഗോളുകളടിച്ച് ടോപ് സ്‌കോററായി. അഭിഷേക് നാല് ഗോളുകളും ദില്‍പ്രീത് സിങ്, വിശാല്‍ അന്റില്‍ എന്നിവര്‍ മൂന്ന് വീതം ഗോളുകളും നേടി. മനിന്ദര്‍ സിങ് ഇരട്ട ഗോളുകള്‍ക്ക് ഉടമയായി. പ്രതാപ് ലക്‌റ, രബിചന്ദ്ര മൊയ്‌രങ്തം, റൗഷന്‍ കുമാര്‍, ശിലാനന്ദ് ലക്‌റ, വിവേക് പ്രസാദ് എന്നിവര്‍ ഓരോ ഗോളും നേടി.