കൊട്ടാരക്കര: പള്ളിക്കല്‍ കരിച്ചാലില്‍ മദ്യപസംഘത്തെ പിടികൂടാനെത്തിയ പൊലിസിനെ ഒരു സംഘം തടഞ്ഞു.
കാലിന് ഗുരതരമായി പരുക്കേറ്റയാളെ പൊലിസ് തള്ളിയിട്ടെന്നാരോപിച്ചാണ് ആള്‍ക്കൂട്ടം പൊലിസിനെ തടഞ്ഞുവച്ചത്.
സംഘം എസ്.ഐ.യെ കയ്യേറ്റം ചെയ്യാന്‍ ശ്രമിക്കുകയും പൊലിസ് ജീപ്പിന്റെ താക്കോല്‍ ഊരിയെടുക്കുകയും ചെയ്തു.
പരുക്കേറ്റ കരിച്ചാല്‍ സ്വദേശി രഞ്ജിത്തിനെ കൊട്ടാരക്കര താലൂക്കാശുപത്രിയില്‍ പ്രവേശിപ്പിച്ചു.
കഴിഞ്ഞ ദിവസം രാത്രി ഒമ്പതോടെ ആയിരുന്നു സംഭവം.
പ്രദേശത്ത് മദ്യപാനികള്‍ സംഘര്‍ഷമുണ്ടാക്കുന്നതായി നിരവധി തവണ ഫോണ്‍ സന്ദേശം ലഭിച്ചതിനെ തുടര്‍ന്നാണ് പൊലിസ് എത്തിയത്.
മദ്യപിച്ച നിലയില്‍ കണ്ടെത്തിയ ചിലരെ പൊലിസ് കസ്റ്റഡിയിലെടുക്കാന്‍ ശ്രമിച്ചു.
ഇതോടെയാണ് പ്രകോപിതരായ സംഘം പൊലിസ് വാഹനത്തിന്റെ താക്കോല്‍ ഊരിയെടുക്കുകയും എസ്.ഐ.യെ കയ്യേറ്റം ചെയ്യാന്‍ ശ്രമിക്കുകയുമായിരുന്നുവെന്ന് സ്‌പെഷ്യല്‍ബ്രാഞ്ചിന്റെ റിപ്പോര്‍ട്ടില്‍ പറയുന്നു.
എന്നാല്‍ സ്ഥലത്തെത്തിയ പൊലിസ് രഞ്ജിത്തിനെ പിടിച്ചു തള്ളുകയായിരുന്നുവെന്നും അപകടത്തില്‍ പരുക്കേറ്റിരുന്ന ഇയ്യാള്‍ റോഡില്‍ വീണെന്നുമാണ് നാട്ടുകാരായ സംഘത്തിന്റെ ആരോപണം.
കൊട്ടാരക്കര പ്രിന്‍സിപ്പല്‍ എസ്.ഐ. സി.കെ മനോജിന്റെ നേതൃത്വത്തില്‍ കൂടുതല്‍ പൊലിസെത്തിയിട്ടും സംഘര്‍ഷത്തിന് അയവുണ്ടായില്ല. നേതാക്കള്‍ ഡി.വൈ.എസ്.പി.യുമായി ബന്ധപ്പെടുകയും അന്വേഷണവും നടപടിയുമുണ്ടാകുമെന്ന് ഉറപ്പ് ലഭിക്കുകയും ചെയ്തതോടെയാണ് പൊലിസുകാരെയും പൊലിസ് വാഹനവും വിട്ടുനല്‍കിയത്.