മുംബൈ: ഇന്ത്യ ഹിന്ദുക്കളുടെ രാജ്യമാണെന്നും അതുകൊണ്ട് ഹിന്ദുക്കള്‍ക്കായിരിക്കണം ഇന്ത്യയില്‍ പ്രഥമ പരിഗണന ലഭിക്കേണ്ടതെന്നും ശിവസേന.

ഹിന്ദുക്കളെ പിന്തുണയ്ക്കുന്ന സര്‍ക്കാര്‍ കേന്ദ്രത്തിലുണ്ടായിട്ടും അയോധ്യയിലെ രാമക്ഷേത്ര നിര്‍മാണം, കശ്മീരി പണ്ഡിറ്റുകളുടെ ഘര്‍ വാപ്പസി എന്നിവയ്ക്ക് ഇപ്പോഴും പരിഹാരമായിട്ടില്ലെന്നും ശിവസേന മുഖപത്രമായ സാമ്‌നയില്‍ പറയുന്നു.

നേരത്തെ ഹിന്ദുസ്ഥാന്‍ ഹിന്ദുക്കളുടെ രാജ്യമാണെന്നും എന്നാല്‍ മറ്റുള്ളവരെ മാറ്റിനിര്‍ത്തില്ലെന്നും ആര്‍.എസ്.എസ് മേധാവി മോഹന്‍ ഭഗവത് പറഞ്ഞിരുന്നു. ഇതിനെ പിന്തുണച്ചുകൊണ്ടാണ് ശിവസേന രംഗത്തെത്തിയിരിക്കുന്നത്.

മുസ്‌ലിംകള്‍ക്കായി അന്‍പതിലധികം രാജ്യങ്ങളാണുള്ളത്. ക്രിസ്ത്യാനികള്‍ക്ക് അമേരിക്കയും യൂറോപ്പും പോലുള്ള രാജ്യങ്ങളുണ്ട്. ബുദ്ധമതക്കാര്‍ക്ക് ചൈന, ജപ്പാന്‍, ശ്രീലങ്ക, മ്യാന്‍മര്‍ പോലുള്ളവയും. ഹിന്ദുക്കള്‍ക്ക് ഇന്ത്യയല്ലാതെ മറ്റൊരു രാജ്യവുമില്ലെന്നും സാമ്‌നയിലെ ലേഖനത്തില്‍ പറയുന്നു.

ഹിന്ദു വിശ്വാസത്തോട് ആഭിമുഖ്യമുള്ളവര്‍ ഭൂരിഭാഗമടങ്ങിയ സര്‍ക്കാരാണ് ഇന്ന് അധികാരത്തില്‍. എന്നിട്ടും അയോധ്യയില്‍ രാമക്ഷേത്രം നിര്‍മിക്കാന്‍ അവര്‍ തയാറാകുന്നില്ല. എല്ലാം കോടതിക്കു വിട്ടുനല്‍കിയിരിക്കുകയാണ്.

പൊതുസ്ഥലങ്ങളില്‍ ദേശീയഗാനം കേള്‍പ്പിക്കുന്നതിനെ കുറിച്ചും മുഖപ്രസംഗത്തില്‍ ശിവസേന നിലപാടു വ്യക്തമാക്കി.

ദേശീയ ഗാനം കേള്‍ക്കുമ്പോള്‍ എഴുന്നേറ്റുനില്‍ക്കാതെ ദേശീയ ഗാനത്തെ അപമാനിക്കുന്നവര്‍ക്കെതിരെ നടപടികളെടുക്കുന്നത് ഹിന്ദുത്വ താല്‍പര്യ സര്‍ക്കാര്‍ കാട്ടിക്കൊടുക്കണമെന്നും അവര്‍ പറയുന്നു.