നീലേശ്വരം: പി.എസ്.സി പരീക്ഷയെഴുതി വീട്ടിലേയ്ക്ക് പോവുകയായിരുന്ന യുവാവിനെ സദാചാര പൊലിസ് സംഘം അക്രമിച്ചു. നീലേശ്വരം ചായ്യോത്തെ സാദിഖി(27)നെയാണ് അക്രമിച്ചത്. ഇയാളെ സ്വകാര്യ ആശുപത്രിയില്‍ പ്രവേശിപ്പിച്ചു. കഴിഞ്ഞദിവസം പുലര്‍ച്ചെ ചിറപ്പുറത്താണ് സംഭവം. ശനിയാഴ്ച നടന്ന പി.എസ്.സി പരീക്ഷയ്ക്ക് സാദിഖിന്റെ പരീക്ഷാ കേന്ദ്രം കൊയിലാണ്ടിയിലായിരുന്നു. തുടര്‍ന്ന് വാഹനം കിട്ടാത്തതിനാല്‍ മടക്കയാത്ര വൈകിയിരുന്നു. പുലര്‍ച്ചെയാണ് നീലേശ്വരത്തെത്തിയത്. പിന്നീട് ചായ്യോത്തെ വീട്ടിലേയ്ക്ക് നടന്നുപോവുന്നതിനിടെചിറപ്പുറത്ത് എത്തിയപ്പോള്‍ നാലംഗ സംഘം തടഞ്ഞുനിര്‍ത്തി ചോദ്യം ചെയ്യുകയും മര്‍ദിച്ചവശനാക്കിയശേഷം വഴിയരികില്‍ തള്ളുകയുമായിരുന്നുവെന്ന് പരാതിയില്‍ പറയുന്നു.
പരാതിയില്‍ കണ്ടാല്‍ അറിയാവുന്ന നാലുപേര്‍ക്കെതിരേ നീലേശ്വരം പൊലിസ് കേസെടുത്തു.