കൊല്‍ക്കത്ത: പ.ബംഗാളില്‍ ഡെങ്കിപ്പനി ബാധയുണ്ടെങ്കിലും പരിഭ്രമിക്കേണ്ടതായ സാഹചര്യമില്ലെന്ന് മുഖ്യമന്ത്രി മമതാ ബാനര്‍ജി. സംസ്ഥാനത്ത് 40 പേര്‍ മരിച്ചിട്ടുണ്ടെങ്കിലും ഇതൊന്നും ഡെങ്കിപ്പനി ബാധമൂലമല്ലെന്ന് അവര്‍ വ്യക്തമാക്കി. സംസ്ഥാനത്ത് ഡെങ്കിപ്പനി ബാധിച്ച് 13 പേരാണ് മരിച്ചത്. എന്നാല്‍ 27 പേര്‍ മരിച്ചത് മലേറിയ ബാധിച്ചാണ്.
അതേസമയം ചിലനിക്ഷിപ്ത താല്‍പര്യക്കാരാണ് ഭീതിജനകമായ സാഹചര്യം സൃഷ്ടിക്കുന്നതെന്ന് അവര്‍ ആരോപിച്ചു. രോഗം പടരാതിരിക്കാനുള്ള മുന്‍കരുതല്‍ സര്‍ക്കാര്‍ സ്വീകരിച്ചിട്ടുണ്ട്. ഏതു സാഹചര്യം നേരിടാനും സര്‍ക്കാര്‍ സജ്ജമാണ്. അതുകൊണ്ടുതന്നെ ആരും ഭയപ്പെടേണ്ടതില്ലെന്നും അവര്‍ വ്യക്തമാക്കി. ആരോഗ്യവകുപ്പ് നല്‍കുന്ന നിര്‍ദേശങ്ങളെ തെറ്റായി വ്യാഖ്യാനിച്ചാണ് ചിലര്‍ പ്രചാരണം നടത്തുന്നത്. ഇത്തരക്കാര്‍ക്കെതിരേ കര്‍ശന നടപടി സ്വീകരിക്കും. 24 മണിക്കൂറും സ്ഥിതിഗതികള്‍ നിരീക്ഷിച്ചുകൊണ്ടിരിക്കുകയാണ്.
രോഗം പടരാതിരിക്കാനായി വേണ്ടി നിയന്ത്രണമാര്‍ഗങ്ങള്‍ സ്വീകരിച്ചിട്ടുണ്ട്. ജനങ്ങള്‍ക്ക് ആവശ്യമായ എല്ലാ സഹായങ്ങളും ലഭ്യമാക്കാന്‍ സര്‍ക്കാര്‍ തയാറാണ്. 24 മണിക്കൂറും ഡോക്ടര്‍മാരുടെ സേവനം ലഭ്യമാക്കാന്‍ വേണ്ട സജ്ജീകരണങ്ങളും ഏര്‍പ്പെടുത്തിയിട്ടുണ്ട്.
മുനിസിപ്പാലിറ്റികള്‍ കേന്ദ്രീകരിച്ച് കൊതുകുനശീകരണ പ്രവര്‍ത്തനങ്ങള്‍ സജീവമാക്കിയിട്ടുണ്ടെന്നും ആരോഗ്യവകുപ്പ് ഉന്നതരുമായി നടത്തിയ ചര്‍ച്ചയ്ക്കു ശേഷം മുഖ്യമന്ത്രി മാധ്യമങ്ങളെ അറിയിച്ചു.