തിരുവനന്തപുരം: അഡ്വക്കറ്റ് ജനറലിനെതിരേ രൂക്ഷ വിമര്‍ശനവുമായി സി.പി.ഐ മുഖപത്രം. മാധ്യമങ്ങള്‍ക്കു മുന്നില്‍ അന്തസില്ലാതെ സംസാരിക്കാന്‍ മാത്രം അധഃപതിക്കരുതെന്ന് മനസിലാക്കാന്‍ പോലും വിവരമില്ലാത്ത ആളാണോ എ.ജിയെന്ന് ഇന്നലെ ജനയുഗത്തിന്റെ എഡിറ്റോറിയല്‍ പേജില്‍ പ്രസിദ്ധീകരിച്ച ലേഖനത്തില്‍ ചോദിക്കുന്നു.
റവന്യൂ മന്ത്രി, സംസ്ഥാനത്തെ മറ്റൊരു മന്ത്രി തന്നെ ഉള്‍പ്പെട്ട സര്‍ക്കാര്‍ ഭൂമി അനധികൃതമായി കൈവശപ്പെടുത്തിയതുസംബന്ധിച്ച വാര്‍ത്താപ്രാധാന്യമുള്ള ഒരു കേസ് അഡീഷനല്‍ അഡ്വക്കറ്റ് ജനറലിനെ തന്നെ കോടതിയില്‍ വാദിക്കാന്‍ ചുമതലപ്പെടുത്തണമെന്ന് ആവശ്യപ്പെട്ട് കത്തു നല്‍കുന്നു. അത്തരമൊരു കത്ത് നല്‍കിയിട്ടുണ്ടെങ്കില്‍ തീര്‍ച്ചയായും ആ മന്ത്രിക്ക് റവന്യൂ വകുപ്പിന്റെ ചുമതലക്കാരനെന്ന നിലയിലുള്ള ആത്മാര്‍ഥതയുടെയും നിയമം നടപ്പാക്കാനുള്ള ആര്‍ജവത്തിന്റെയും ഉദാഹരണമാണത്.
താന്‍ കൂടി ഉള്‍പ്പെട്ട മന്ത്രിസഭയുടെ തീരുമാനപ്രകാരം നിയമിതനായ അഡ്വക്കറ്റ് ജനറലിനോട് അഡ്വക്കറ്റ് ജനറലിന്റെ തുല്യപ്രാധാന്യമുള്ള, റവന്യൂ കേസുകള്‍ നടത്തി പരിചയസമ്പന്നനായ അഡീഷനല്‍ അഡ്വക്കറ്റ് ജനറലിനെ ഏല്‍പ്പിക്കണം എന്ന് കത്തിലൂടെ അറിയിച്ചതില്‍ എന്താണ് അസാംഗത്യമെന്ന് ഇന്ത്യന്‍ ഭരണഘടന ആകെ പരിശോധിച്ചാലും കാണാന്‍ സാധിക്കുകയില്ല. ഏറ്റവും പരിതാപകരമായ കാര്യം സ്വന്തം പദവിയെക്കുറിച്ച് ഊറ്റംകൊള്ളുന്ന അഡ്വക്കറ്റ് ജനറല്‍ മാധ്യമങ്ങള്‍ക്കു മുന്‍പാകെ 'റവന്യൂ വിഷയങ്ങള്‍ റവന്യൂമന്ത്രിയുടെ തറവാട്ടുസ്വത്തല്ല' എന്ന് ആക്രോശിച്ചതാണ്. സംസ്ഥാന സര്‍ക്കാരിന് നിയമപാഠങ്ങള്‍ പറഞ്ഞുകൊടുക്കേണ്ട,നിയമസഭയില്‍ ഇരിപ്പിടത്തിന് അര്‍ഹതയുള്ള ഒരാള്‍ ഒരു മന്ത്രി അയച്ച കത്തിനു മറുപടി അയക്കുന്നതിനുപകരം ചാനലുകള്‍ക്കു മുന്നില്‍നിന്ന് അന്തസില്ലാതെ സംസാരിക്കാന്‍ മാത്രം അധഃപതിക്കരുത് എന്നു മനസിലാക്കാന്‍പോലും വിവരമില്ലാത്തയാളാണോ? ഒരു ഔദ്യോഗിക കത്തിന് എങ്ങനെയാണ് മറുപടി നല്‍കേണ്ടതെന്ന് സ്വന്തം ഓഫിസിലെ അസിസ്റ്റന്റിനോടെങ്കിലും ചോദിക്കുക. അയാള്‍ പറഞ്ഞുതരുമെന്നും ലേഖനത്തില്‍ കുറ്റപ്പെടുത്തുന്നു.