മാനന്തവാടി: വെള്ളമുണ്ട, പടിഞ്ഞാറത്തറ പൊലിസ് സ്റ്റേഷന്‍ പരിധിയില്‍ വരുന്ന കക്കടവ് പുഴയോരങ്ങളില്‍ വൈകുന്നേരങ്ങളില്‍ തമ്പടിച്ച് അര്‍ധരാത്രി വരെ പ്രദേശത്തെ സമാധാനന്തരീക്ഷം തകര്‍ക്കാന്‍ ശ്രമിക്കുന്ന മദ്യ, മയക്ക് മരുന്ന് സംഘങ്ങള്‍ക്ക് തടയിടുവാന്‍ ഉത്തരവാദപ്പെട്ടവര്‍ നടപടികള്‍ സ്വീകരിക്കണമെന്ന് പാലിയാണ പൗരസമിതി ആവശ്യപ്പെട്ടു.
പടിഞ്ഞാറത്തറ, വെള്ളമുണ്ട പഞ്ചായത്തുകളിലെ വിവിധ പ്രദേശങ്ങളില്‍ നിന്നും കക്കടവ് പാലത്തിനടുത്ത് വാഹനങ്ങളില്‍ എത്തുന്ന സംഘങ്ങള്‍ പാലത്തിനടിയിലും കക്കടവ് ലിഫ്റ്റ് ഇറിഗേഷന്‍ തടയണക്ക് സമീപവും രാത്രി വൈകുവോളം ഇവിടെ ചിലവഴിക്കുകയാണ്.
15 വയസില്‍ താഴെയുള്ള വിദ്യാര്‍ഥികളും വാഹന നിയമങ്ങളൊന്നും പാലിക്കാതെയാണ് ബൈക്കുകളിലും മറ്റും എത്തുന്നത്. നീന്താന്‍ വശമില്ലാത്തവര്‍ പുഴയില്‍ കുളിക്കാനിറങ്ങുന്നതും അപകടങ്ങള്‍ക്ക് കാരണമായേക്കാം. മദ്യവും കഞ്ചാവ് പോലുള്ള മയക്ക് മരുന്നുകളും പരസ്യമായാണ് ഇവിടങ്ങളില്‍ ഉപയോഗിക്കുന്നത്. പ്രദേശത്തെ കള്ള് ഷാപ്പ് അടക്കുന്നതോടെ അനധികൃത മദ്യവില്‍പ്പന നടത്തുന്ന വീടുകള്‍ തേടി ആളുകള്‍ നടക്കുന്നതും പതിവ് കാഴ്ചയാണ്. ഉപയോഗം കഴിഞ്ഞ മദ്യ കുപ്പികളും പ്ലാസ്റ്റിക് ഗ്ലാസുകളും ഭക്ഷണത്തിന്റെ അവശിഷ്ട്ടങ്ങളും പുഴയിലേക്ക് തള്ളുന്നതിനാല്‍ പുഴ പൂര്‍ണമായി മലിനമായിരിക്കുകയാണ്. മദ്യപിച്ച് ലക്ക് കെട്ടവര്‍ നടത്തുന്ന സാമൂഹ്യ വിരുദ്ധ പ്രവര്‍ത്തനങ്ങളും നിരവധിയാണ്. ഇതിന് തടയിടാന്‍ അധികൃതരുടെ ഭാഗത്ത് നിന്നും അടിയന്തിര ശ്രദ്ധ പതിയണമെന്നാണ് ആവശ്യം.