ജമ്മു: ജമ്മു കശ്മീരില്‍ വീണ്ടും പാകിസ്താന്റെ വെടിനിര്‍ത്തല്‍ കരാര്‍ ലംഘനം. പൂഞ്ച് ജില്ലയിലെ ഷാഹ്പു ഖാന്‍ഡി പ്രദേശത്തേക്കാണ് പാകിസ്താന്റെ ഭാഗത്തുനിന്നു വെടിവയ്പുണ്ടായത്. ഇന്ന് പുലര്‍ച്ചെയാണ് സംഭവം. യാതൊരു പ്രകോപനവും കൂടാതെയാണ് പാകിസ്താന്‍ വെടിവെപ്പുണ്ടായതെന്ന് സൈനിക വൃത്തങ്ങള്‍ അറിയിച്ചു.

തുടര്‍ന്ന് ഇന്ത്യന്‍ സൈന്യം ശക്തമായി തിരിച്ചടിച്ചു. ആളപായമോ നാശനഷ്ടമോ ഇതുവരെ റിപ്പോര്‍ട്ട് ചെയ്യപ്പെട്ടിട്ടില്ല. പ്രദേശത്ത് ഇപ്പോഴും വെടിവയ്പ് തുടരുകയാണ്.

ആദ്യം ലൈറ്റ് മെഷീന്‍ ഗണ്ണുപയോഗിച്ചും പിന്നീട് മീഡിയം മെഷീന്‍ ഗണ്ണുപയോഗിച്ചുമാണ് ആക്രമണം നടത്തിയതെന്നാണ് റിപ്പോര്‍ട്ടുകള്‍.

കഴിഞ്ഞ ദിവസം പൂഞ്ച് ജില്ലയില്‍ അമര്‍നാഥിലേക്കുള്ള തീര്‍ത്ഥാടകര്‍ക്കു നേരെ നടന്ന ഗ്രനൈഡ് ആക്രമണത്തില്‍ 11 പേര്‍ക്ക് പരുക്കേറ്റിരുന്നു.

സ്വാതന്ത്രദിനത്തിന് തലേദിവസം അതിര്‍ത്തിയിലുണ്ടായ പ്രകോപനത്തെ സൈന്യം അതീവ ഗൗരവത്തോടെയാണ് കാണുന്നത്.