റിയാദ്: സഊദി അഴിമതിവിരുദ്ധ സമിതിയുടെ നേതൃത്വത്തില്‍ പിടികൂടിയ പ്രതികളുടെ വിദേശ ബാങ്ക് അകൗണ്ടുകള്‍ മരവിപ്പിച്ചു. സഊദിയുടെ അഭ്യര്‍ഥന മാനിച്ച് യു.എ.ഇ, ബഹ്‌റൈന്‍, ലബനോന്‍ എന്നീ രാജ്യങ്ങളാണ് പ്രതികളായവരുടെ അകൗണ്ടുകള്‍ മരവിപ്പിച്ചത്.
ഇവരുടെ സഊദി അകൗണ്ടുകള്‍ നേരത്തേതന്നെ സഊദി മോണിറ്ററിങ് ഏജന്‍സി മരവിപ്പിച്ചിരുന്നു. അഴിമതിക്കേസില്‍ കുറ്റം ചുമത്തപ്പെട്ട പിടിയിലായവരുടെ സ്വന്തം പേരിലുള്ള അകൗണ്ടുകള്‍ മാത്രമാണ് സഊദിയും വിദേശ രാജ്യങ്ങളും മരവിപ്പിച്ചിരിക്കുന്നത്. ഇവരുടെ പൂര്‍ണ ഉടമസ്ഥതയിലുള്ള കമ്പനികളുടെയോ ഓഹരി പങ്കാളിത്തമുള്ള കമ്പനികളുടെയും അകൗണ്ടുകള്‍ ഇപ്പോഴും പ്രവര്‍ത്തന സജ്ജമാണ്.
എന്നാല്‍, ഇങ്ങനെയുള്ള അകൗണ്ടുകളില്‍ പിടിയിലായവര്‍ക്ക് യാതൊരു വിധ കൈകാര്യവും അനുവദിക്കുകയില്ല. നിലവില്‍ അകൗണ്ടുകള്‍ മരവിപ്പിച്ച വിദേശ രാജ്യങ്ങള്‍ക്കു പുറമെ ജി.സി.സി അംഗ രാജ്യമായ കുവൈത്തും ഇതിനായുള്ള ശ്രമങ്ങള്‍ ആരംഭിച്ചതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.
സഊദിയില്‍ അറസ്റ്റിലായവരുടെ വിവരങ്ങള്‍ കുവൈത്ത് സെന്‍ട്രല്‍ ബാങ്ക് ശേഖരിക്കാന്‍ തുടങ്ങിയിട്ടുണ്ട്. എന്നാല്‍, ഇതുവരെ നടപടികള്‍ കൈക്കൊണ്ടിട്ടില്ല.
കഴിഞ്ഞ ശനിയാഴ്ച്ചയാണ് സഊദി രാജകുമാരന്മാരടക്കം നിരവധി പേരെ അഴിമതിവിരുദ്ധ സമിതിയുടെ നേതൃത്വത്തില്‍ പിടികൂടിയത്. 208 പേരെയാണ് ഇതുവരെ പിടികൂടിയതെന്ന് അറ്റോര്‍ണി ജനറല്‍ ശൈഖ് സഊദ് അല്‍ മുഅജബ് കഴിഞ്ഞ ദിവസം വെളിപ്പെടുത്തിയിരുന്നു.
കേസില്‍ അറസ്റ്റു ചെയ്ത ശേഷം തെളിവില്ലെന്ന് വ്യക്തമായതിനെ തുടര്‍ന്ന് വിട്ടയക്കപ്പെട്ടവരുടെ കൂട്ടത്തില്‍ രാജകുമാരന്മാരോ മന്ത്രിമാരോ ഇല്ലെന്ന് സഊദി മാധ്യമങ്ങള്‍ റിപ്പോര്‍ട്ട് ചെയ്തു.