കൊല്ലം: ചാനല്‍ ലേഖകന് വധ ഭീഷണി മുഴക്കിയ സി.പി.എം കൊല്ലം ജില്ലാ കമ്മിറ്റിയംഗത്തിനെതിരേ നടപടിയെടുക്കാതെ സി.പി.എം നേതൃത്വം. സംഭവത്തില്‍ പ്രതിഷേധം ശക്തമായി. മീഡിയാവണ്‍ കൊല്ലം റിപ്പോര്‍ട്ടര്‍ ശ്യാം ബാബുവിന് നേരെയാണ് സി.പി.എം കൊല്ലം ജില്ലാ കമ്മിറ്റിയംഗം ക. ബാബു പണിക്കര്‍ വധഭീഷണിയുയര്‍ത്തിയത്. നെട്ടയം രാമഭദ്രന്‍ വധക്കേസില്‍ സി.ബി.ഐ പ്രതി ചേര്‍ക്കപ്പെട്ടയാളാണ് ബാബു പണിക്കര്‍. ഉപകാരങ്ങള്‍ മറക്കില്ലെന്നും ഇന്നല്ലെങ്കില്‍ നാളെ തിരിച്ചടിയുണ്ടാകുമെന്നുമാണ് ഭീഷണി. രാമഭദ്രന്‍ വധക്കേസുമായി ബന്ധപ്പെട്ട് വാര്‍ത്തകള്‍ പ്രസിദ്ധീകരിച്ചതിന്റെ പ്രതികാരമാകാം ഭീഷണിക്ക് പിന്നിലെന്ന് കരുതുന്നു.
ശനിയാഴ്ച ഉച്ചക്ക് രണ്ടോടെ ഏരൂര്‍ കരിമ്പിന്‍ കോണത്ത് വച്ചാണ് സംഭവം. ബാബു പണിക്കര്‍ ശ്യാമിനെ കടന്ന് പിടിച്ചുകൊണ്ടാണ് ഭീഷണി മുഴക്കിയതത്രേ. ഇത് സംബന്ധിച്ച് ശ്യാം ബാബു ഏരൂര്‍ പൊലിസ് സ്‌റ്റേഷനില്‍ പരാതി നല്‍കിയിരുന്നു.