കോഴിക്കോട്: സംസ്ഥാന സ്‌കൂള്‍ ശാസ്‌ത്രോത്സവത്തിന്റെ ഒരുക്കങ്ങള്‍ പൂര്‍ത്തിയായി. നവംബര്‍ 23മുതല്‍ 26വരെ കോഴിക്കോട്ടു നടക്കുന്ന ശാസ്‌ത്രോത്സവത്തില്‍ 217 ഇനങ്ങളിലായി 6802 മത്സരാര്‍ഥികള്‍ പങ്കെടുക്കുമെന്ന് സംഘാടകസമിതി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
പ്രവൃത്തി പരിചയ മേളയില്‍ 3500 ഉും ശാസ്ത്രമേളയില്‍ 700ഉും ഐ.ടി മേളയില്‍ 308ഉും വൊക്കേഷണല്‍ എക്‌സ്‌പോയില്‍ 250 വിദ്യാര്‍ഥികളും മത്സരിക്കും. 37 ഇനങ്ങളില്‍ സ്‌പെഷല്‍ സ്‌കൂള്‍ വിദ്യാര്‍ഥികളും മത്സരത്തിനെത്തും. 23ന് രാവിലെ 8.30ന് നടക്കാവ് ഗവ. ഗേള്‍സ് എച്ച്. എസ്.എസില്‍ രജിസ്‌ട്രേഷന്‍ ആരംഭിക്കും.
24ന് രാവിലെ പത്തിന് മലബാര്‍ ക്രിസ്ത്യന്‍ കോളജില്‍ തയാറാക്കിയ വേദിയില്‍ വിദ്യാഭ്യാസ വകുപ്പ് മന്ത്രി സി.രവീന്ദ്രനാഥ് ശാസ്‌ത്രോത്സവത്തിന്റെ ഔപചാരിക ഉദ്ഘാടനം നിര്‍വഹിക്കും. എ പ്രദീപ് കുമാര്‍ എം.എല്‍.എ അധ്യക്ഷനാകും. 26ന് മൂന്നുമണിക്ക് സമാപന സമ്മേളനം നടക്കും.