തൃശൂര്‍: 26ാമത് സംസ്ഥാന സി.ബി.എസ്.ഇ കലോത്സവത്തിന് തിരിതെളിഞ്ഞു. ചിറ്റിലപ്പിള്ളി ഐ.ഇ.എസ് പബ്ലിക് സ്‌കൂളിലെ പ്രധാന വേദിയില്‍ നടന്ന ചടങ്ങ് കൃഷിമന്ത്രി വി.എസ് സുനില്‍കുമാര്‍ ഉദ്ഘാടനം ചെയ്തു.
കാലടി സര്‍വകലാശാല മുന്‍ വി.സി ഡോ. എം.സി ദിലീപ്കുമാര്‍, സിനിമാതാരം സുരഭിലക്ഷ്മി, ഗായകന്‍ ഫ്രാങ്കോ എന്നിവര്‍ മുഖ്യാതിഥികളായി പങ്കെടുത്തു. ഐ.ഇ.എസ് വിദ്യാര്‍ഥികള്‍ അവതരിപ്പിച്ച സ്വാഗത നൃത്തത്തോടെയാണ് ഉദ്ഘാടന ചടങ്ങുകള്‍ ആരംഭിച്ചത്.
21 സ്‌റ്റേജുകളിലായി നടക്കുന്ന മത്സരങ്ങള്‍ നാളെ സമാപിക്കും. സി.ബി.എസ്.ഇ സ്‌കൂള്‍ മാനേജ്‌മെന്റ് അസോസിയേഷന്‍ പ്രസിഡന്റ് അഡ്വ. ടി.പി.എം ഇബ്രാഹിം ഖാന്‍ അധ്യക്ഷനായി.
കോണ്‍ഫെഡറേഷന്‍ ഓഫ് കേരള സഹോദയ കോംപ്ലക്‌സ് പ്രസിഡന്റ് കെ ഉണ്ണികൃഷ്ണന്‍, ജനറല്‍ സെക്രട്ടറി കെ.എ ഫ്രാന്‍സിസ്, തൃശൂര്‍ ജില്ലാ സി.ബി.എസ്.ഇ സ്‌കൂള്‍സ് മാനേജ്‌മെന്റ് അസോസിയേഷന്‍ സെക്രട്ടറി മുഹമ്മദ് അലി, ഡോ. ദിനേശ് ബാബു, മുഹമ്മദ് അലി കെ.പി, ലതാപ്രകാശ് സംസാരിച്ചു.

തൃശൂര്‍ സഹോദയ മുന്നില്‍
തൃശൂര്‍: ആദ്യദിനത്തില്‍ 151 പോയിന്റോടെ ആതിഥേയരായ തൃശൂര്‍ സഹോദയ ഒന്നാം സ്ഥാനത്ത്. 115 പോയിന്റോടെ മലബാര്‍ സഹോദയയും 113 പോയിന്റോടെ പാലക്കാട് സഹോദയയുമാണ് രണ്ടും മൂന്നും സ്ഥാനങ്ങളില്‍. സ്‌കൂളുകളില്‍ 27 പോയിന്റുമായി കാഞ്ഞങ്ങാട് ക്രൈസ്റ്റ് സി.എം.ഐ പബ്ലിക് സ്‌കൂളാണ് ഒന്നാംസ്ഥാനത്തുള്ളത്. കോട്ടയം ആനക്കല്‍ സെന്റ് ആന്റണീസ് പബ്ലിക് സ്‌കൂള്‍ 26 പോയിന്റോടെ തൊട്ടുപിന്നിലുണ്ട്. കോഴിക്കോട് ദേവഗിരി സി.എം.ഐ പബ്ലിക് സ്‌കൂള്‍ - 25, കോഴിക്കോട് പെരുന്തുരുത്തി ഭാരതിയ വിദ്യാഭവന്‍ - 24, ഓമശ്ശേരി പ്ലസന്റ് ഇംഗ്ലീഷ് സ്‌കൂള്‍ - 23 എന്നിങ്ങനെയാണ് തൊട്ടടുത്തുള്ള സ്‌കൂളുകളുടെ പോയിന്റ് നില.