റോത്തക്: രഞ്ജി ട്രോഫി ക്രിക്കറ്റില്‍ ഗംഭീര ജയത്തോടെ കേരളം ക്വാര്‍ട്ടറില്‍. ഹരിയാനയുടെ ചെറുത്തുനില്‍പ്പിനെ ടീം ഗെയിമുകൊണ്ട് മറികടന്ന കേരളം ഇന്നിങ്‌സിനും എട്ടു റണ്‍സിനുമാണ് ജയം സ്വന്തമാക്കിയത്. ബോണസ് പോയിന്റോടെ ജയം നേടിയ കേരളം ഗ്രൂപ്പ് ബിയില്‍ രണ്ടാം സ്ഥാനക്കാരായിട്ടാണ് നോക്കൗട്ടിലേക്ക് മുന്നേറിയത്. ഏഴുപോയിന്റാണ് കേരളം മത്സരത്തില്‍ നിന്ന് നേടിയത്.
അഞ്ചിന് 83 എന്ന നിലയില്‍ ബാറ്റിങ് തുടങ്ങിയ ഹരിയാന കേരളത്തിന്റെ ക്ഷമ പരീക്ഷിച്ച ശേഷമാണ് മത്സരം കൈവിട്ടത്. രജത് പലിവാല്‍(34) അമിത് മിശ്ര(40) എന്നിവരാണ് ആദ്യ സെഷനില്‍ പിടിച്ചുനിന്നത്. 130 പന്തില്‍ 34 റണ്‍സെടുത്ത പലിവാലിനെ ജലജ് സക്‌സേന പുറത്താക്കിയതോടെ ഹരിയാന ആറിന് 119 എന്ന സ്‌കോറിലേക്ക് വീണു. ഇതേ സ്‌കോറില്‍ തന്നെ അമിത് മിശ്രയെ എം.ഡി നിതീഷും പുറത്താക്കിയതോടെ ഹരിയാന തോല്‍വി ഉറപ്പിച്ചു. പൂനിഷ് മേത്ത(32*)യുടെ ചെറുത്തുനില്‍പ്പ് മത്സരത്തെ മുന്നോട്ടുകൊണ്ടുപോയെങ്കിലും വാലറ്റത്ത പിഴുത് കേരളം അനായാസ ജയം സ്വന്തമാക്കുകയായിരുന്നു.
കേരളത്തിന്റെ ബൗളര്‍മാരില്‍ ജലജ് സക്‌സേനയും നിതീഷും മൂന്നുവിക്കറ്റ് വീഴ്ത്തി. ബേസില്‍ തമ്പി രണ്ടും സന്ദീപ് വാര്യര്‍, അരുണ്‍ കാര്‍ത്തിക് ഓരോ വിക്കറ്റെടുത്തു. ആദ്യ ഇന്നിങ്‌സില്‍ അര്‍ധസെഞ്ച്വറി നേടുകയും രണ്ടിന്നിങ്‌സുകളിലുമായി നാലുവിക്കറ്റെടുക്കുകയും ചെയ്ത സക്‌സേനയാണ് കളിയിലെ താരം. ടൂര്‍ണമെന്റില്‍ കേരളം ആറു കളിയില്‍ നിന്ന് 31 പോയിന്റാണ് നേടിയത്.
അതേസമയം പ്ലേറ്റ്-എലൈറ്റ് അടിസ്ഥാനത്തില്‍ മത്സരം നടന്ന 2007-08 സീസണില്‍ എലൈറ്റിലേക്ക് കടന്നതാണ് സമീപകാലത്ത് രഞ്ജി ട്രോഫിയില്‍ കേരളത്തിന്റെ ഏറ്റവും വലിയ നേട്ടം. പൂള്‍ മത്സരങ്ങള്‍ വന്നതിന് ശേഷം കേരളം ആദ്യമായിട്ടാണ് ക്വാര്‍ട്ടറിലെത്തുന്നത്. ഇക്കുറി നാലു ഗ്രൂപ്പുകളായിട്ടായിരുന്നു മത്സരം. ഏഴു ടീമുകളടങ്ങിയ ഓരോ ഗ്രൂപ്പില്‍ നിന്നും രണ്ട് ടീമുകള്‍ വീതമാണ് ക്വാര്‍ട്ടറിലെത്തുക. സീസണില്‍ കളിച്ച ആറു കളികളില്‍ ഗുജറാത്തിനോട് മാത്രമാണ് കേരളം പരാജയപ്പെട്ടത്.
ആദ്യ ഇന്നിങ്‌സില്‍ 181 റണ്‍സിന്റെ ല ീഡു പിടിക്കാനായത് കേരളത്തിന് കാര്യങ്ങള്‍ എളുപ്പമാക്കുകയായിരുന്നു. നൈറ്റ് വാച്ച് മാനായി ക്രീസിലെത്തിയ ബേസില്‍ തമ്പിയുടെ മിന്നല്‍ വേഗത്തിലുള്ള അര്‍ധസെഞ്ച്വറി മത്സരത്തില്‍ നിര്‍ണായകമായി. ഇതോടൊപ്പം പുതിയ കോച്ച് ഡേവ് വാട്‌മോറിന്റെ പരിശീലനവും ടീമിനെ പുതിയ തലത്തിലേക്ക് നയിക്കുകയായിരുന്നു.
ടീമിനായി മികച്ച ഓള്‍റൗണ്ട് പ്രകടനം കാഴ്ച്ചവച്ച അതിഥി താരം ജലജ് സക്‌സേനയുടെ ഫോം ടീമിനെ കരുത്തുറ്റതാക്കുകയായിരുന്നു. സീസണില്‍ രണ്ടു സെഞ്ച്വറികളുമായി സഞ്ജു സാംസണ്‍ ഫോം വീണ്ടെടുത്തതും രോഹന്‍ പ്രോം അവസരത്തിനൊത്ത് ഉയര്‍ന്നതും ടീമിന് ഗുണകരമായി. സിജോമോന്‍ ജോസഫ്, നിതേഷ് എന്നിവരുടെ ബൗളിങ് പ്രകടനവും ടീമിന്റെ തകര്‍പ്പന്‍ പ്രകടനത്തില്‍ എടുത്ത് പറയേണ്ടതാണ്.

ഗുജറാത്തും ക്വാര്‍ട്ടറില്‍
റാഞ്ചി: ഗ്രൂപ്പ് ബിയില്‍ ജാര്‍ഖണ്ഡിനെതിരായ വമ്പന്‍ ജയത്തോടെ ഗുജറാത്ത് ഒന്നാം സ്ഥാനക്കാരായി ക്വാര്‍ട്ടറില്‍ കടന്നു. പത്തുവിക്കറ്റിനാണ് ഗുജറാത്ത് ജയം സ്വന്തമാക്കിയത്.
ഗുജറാത്തിന്റെ ഒന്നാം ഇന്നിങ്‌സ് സ്‌കോര്‍ 411നെതിരേ ജാര്‍ഖണ്ഡ് 242 റണ്‍സിന് പുറത്തായി ഫോളോ ഓണ്‍ വഴങ്ങിയിരുന്നു. തുടര്‍ന്ന് രണ്ടാം വട്ട ബാറ്റിങിനിറങ്ങിയ ജാര്‍ഖണ്ഡിന് പിന്നെയും അടിതെറ്റുകയായിരുന്നു. 183 റണ്‍സിന് അവര്‍ രണ്ടാം ഇന്നിങ്‌സില്‍ പുറത്തായി.
ഇതോടെ 15 റണ്‍സിന്റെ വിജയലക്ഷ്യമാണ് ഗുജറാത്തിന് ലഭിച്ചത്. പ്രിയാങ്ക പഞ്ചല്‍(12*) സമിത് ഗോഹല്‍(4*) എന്നിവരുടെ മികവില്‍ 10 പന്തില്‍ ലക്ഷ്യം കാണുകയായിരുന്നു ഗുജറാത്ത്.