നാദാപുരം: ' എന്റെ മോന്‍ നിരപരാധിയാണെന്ന് ഇങ്ങളോട് കെഞ്ചിപ്പറഞ്ഞിട്ടും ആരും കേട്ടില്ല, ഓരെന്റെ മോനെ വെറുതെ വിട്ടില്ല, നിരപരാധിയായിരുന്നിട്ടും അവരെന്റെ മോനെ കൊന്നില്ലേ?'. നാദാപുരത്ത് കൊല്ലപ്പെട്ട മുഹമ്മദ് അസ്‌ലമിന്റെ വീട് സന്ദര്‍ശിക്കാനെത്തിയ ജില്ലാ കലക്ടര്‍ എന്‍. പ്രശാന്തിന്റെ കൈപിടിച്ചു മാതാവ് സുബൈദ വിങ്ങിപ്പൊട്ടിയപ്പോള്‍ സമീപത്തുണ്ടായിരുന്നവരുടെയും കണ്ണുനിറഞ്ഞു. ഷിബിന്‍ വധത്തെത്തുടര്‍ന്നു കിടപ്പാടം നഷ്ടപ്പെട്ട സുബൈദ നിഷേധിക്കപ്പെട്ട സഹായധനം ലഭിക്കാനായി പലതവണ ജില്ലാ കലക്ടറുടെ ഓഫിസില്‍ സന്ദര്‍ശനം നടത്തിയിരുന്നു. വീട്ടില്‍ വച്ച് കലക്ടറുടെ മുഖം ഇവരുടെ ഓര്‍മയില്‍ വന്നതോടെയാണ് സുബൈദയ്ക്ക് ആത്മനിയന്ത്രണം നഷ്ടമായത്.
അര്‍ഹമായ നഷ്ടപരിഹാരം ലഭിക്കാത്തതിനെ തുടര്‍ന്ന് അസ്‌ലമിന്റെ കുടുംബം വാടക വീടുകള്‍ തേടി അലയുകയായിരുന്നു. ഷിബിന്‍ വധക്കേസില്‍ മൂന്നാംപ്രതിയായി അസ്‌ലമിനെ പൊലിസ് ഉള്‍പ്പെടുത്തിയതോടെ സര്‍ക്കാര്‍ പ്രഖ്യാപിച്ച നഷ്ടപരിഹാരം നല്‍കുന്നതിനെതിരേ സി.പി.എമ്മും ബി.ജെ.പിയും പ്രതിഷേധവുമായി രംഗത്തെത്തിയതാണ് ഈ കുടുംബത്തിന് ആനുകൂല്യം നിഷേധിക്കാനിടയാക്കിയത്. ഷിബിന്‍ കൊല്ലപ്പെട്ടതിനേ തുടര്‍ന്നുണ്ടായ അക്രമത്തില്‍ നാശനഷ്ടം നേരിട്ടവര്‍ക്ക് സര്‍ക്കാര്‍ പ്രഖ്യാപിച്ച നഷ്ടപരിഹാരത്തുക ലഭിച്ചപ്പോള്‍ കഷ്ടപ്പാടുകള്‍ മാത്രം കൈമുതലായി ജീവിതം നയിക്കുന്ന സുബൈദയെയും പ്രതിപ്പട്ടികയിലുള്ള മറ്റുള്ളവരെയും മാറ്റി നിര്‍ത്തുകയായിരുന്നു. സ്വന്തം വീടെന്ന സ്വപ്നം പൂര്‍ത്തിയാക്കാനാകാതെ മകന്റെ ചേതനയറ്റ ശരീരം വാടക വീട്ടില്‍ വച്ച് കാണേണ്ടിവന്ന ദുഃഖഭാരവും സുബൈദക്ക് താങ്ങാവുന്നതിലും അപ്പുറമായിരുന്നു.