എടച്ചേരി: കുരുന്നു കൈകളില്‍ നിറയെ കളിപ്പാട്ടങ്ങള്‍ നല്‍കി ഒരു കൂട്ടം വിദ്യാര്‍ഥികള്‍ മാതൃകയായി. ഇരിങ്ങണ്ണൂര്‍ ഹയര്‍ സെക്കന്‍ഡറി സ്‌കൂള്‍ എന്‍.എസ്.എസ് വിദ്യാര്‍ഥികളാണ് അങ്കണവാടിയില്‍ പഠിക്കുന്ന കൊച്ചു കൂട്ടുകാര്‍ക്ക് കളിക്കോപ്പുകള്‍ സമ്മാനിച്ചത്. എടച്ചേരി പഞ്ചായത്തിലെ എല്ലാ അങ്കണവാടികളിലും ഇവര്‍ കളിപ്പാട്ടങ്ങള്‍ എത്തിച്ചു. സംസ്ഥാന വ്യാപകമായി എന്‍.എസ്.എസ് സംഘടിപ്പിക്കുന്ന സ്‌നേഹ സമ്മാനം പദ്ധതിയുടെ ഭാഗമായാണ് മാതൃകാപരമായ ഈ പ്രവര്‍ത്തനം വിദ്യാര്‍ഥികള്‍ ഏറ്റെടുത്ത് നടപ്പിലാക്കിയത്.

പഞ്ചായത്തിലെ വിവിധ വീടുകളില്‍ നിന്ന് ശേഖരിച്ചതാണ് പഴയതും പുതിയതുമായ ഈ കളിപ്പാട്ടങ്ങള്‍. വിദ്യാര്‍ഥികളുടെ ഈ നല്ല മനസിന് പിന്തുണയുമായി ഒട്ടനവധി രക്ഷിതാക്കളും കൂടെച്ചേര്‍ന്നപ്പോള്‍ പുത്തന്‍ കളിക്കോപ്പുകളുടെ എണ്ണവും വര്‍ധിച്ചു. പഞ്ചായത്തിലെ 30 അങ്കണവാടികളിലെ കുട്ടികള്‍ക്കും വേണ്ടത്ര കളിക്കോപ്പുകള്‍ ലഭിച്ചപ്പോള്‍ അങ്കണവാടി വര്‍ക്കര്‍മാര്‍ക്കും സന്തോഷം. എല്‍.എസ്.എസ് കോഡിനേറ്റര്‍ വി.ടി സഗീന ടീച്ചര്‍ കുട്ടികള്‍ക്ക് വേണ്ട നിര്‍ദ്ദേശങ്ങള്‍ നല്‍കി അവരുടെ കൂടെ നിന്ന് പ്രവര്‍ത്തിച്ചു. 

പാഠ്യ പാഠ്യേതര രംഗത്ത് മേന്മ പുലര്‍ത്തിയ നാദാപുരം മണ്ഡലത്തിലെ ഏറ്റവും മികച്ച ഹയര്‍സെക്കന്‍ഡറി സ്‌കൂളായി ഇരിങ്ങണ്ണൂര്‍ ഹയര്‍സെക്കന്‍ഡറി സ്‌കൂളിനെ ഗ്രീന്‍ വോയ്‌സ് എന്ന പ്രവാസി സംഘടന നേരത്തെ തെരെഞ്ഞെടുത്തിരുന്നു.