ന്യൂഡല്‍ഹി: ഗുജറാത്ത് തെരഞ്ഞെടുപ്പില്‍ പാകിസ്താന്‍ ഇടപെടുന്നുവെന്ന പ്രധാനമന്ത്രി നരേന്ദ്ര മോദിയുടെ പരാമര്‍ശത്തിനെതിരേ പാകിസ്താന്‍.
ഗുജറാത്ത് തെരഞ്ഞെടുപ്പ് വിഷയത്തില്‍ പാകിസ്താനെ വലിച്ചിഴക്കരുതെന്ന് പറഞ്ഞ പാകിസ്താന്‍ വിദേശ കാര്യ മന്ത്രാലയ വക്താവ് മുഹമ്മദ് ഫൈസല്‍, മെനഞ്ഞുണ്ടാക്കുന്ന ഗൂഢാലോചനകള്‍കൊണ്ടല്ല തന്റെ മാത്രം ശക്തിയില്‍ തെരഞ്ഞെടുപ്പില്‍ ജയിക്കനാണ് ശ്രമിക്കേണ്ടതെന്നും മോദിയെ ഓര്‍മിപ്പിച്ചു. ട്വിറ്ററിലൂടെയാണ് അദ്ദേഹം മോദിയുടെ ആരോപണങ്ങള്‍ക്ക് മറുപടി നല്‍കിയത്.
വര്‍ഗീയതയിലൂടെ വീണ്ടും ഗുജറാത്തില്‍ അധികാരത്തിലേറുന്നതിനായിട്ടുള്ള ശ്രമത്തിന്റെ ഭാഗമായാണ് മോദി പാകിസ്താനെതിരേ ആരോപണം ഉന്നയിച്ചത്. അഹമ്മദ് പട്ടേലിനെ ഗുജറാത്ത് മുഖ്യമന്ത്രിയാക്കാന്‍ പാകിസ്താന്‍ ശ്രമിക്കുന്നുവെന്നാണ് പലാന്‍പൂരില്‍ നടന്ന തെരഞ്ഞെടുപ്പ് റാലിയില്‍ മോദി ആരോപിച്ചിരുന്നത്.
മോദിയുടെ പരാമര്‍ശം തീര്‍ത്തും അടിസ്ഥാന രഹിതവും നിരുത്തരവാദപരവുമാണെന്ന് പാകിസ്താന്‍ വ്യക്തമാക്കി. ഇന്ത്യയുടെ തെരഞ്ഞെടുപ്പ് രാഷ്ട്രീയത്തില്‍ പാകിസ്താനെ വലിച്ചിഴക്കുന്നത് അവസാനിപ്പിക്കണമെന്നും പാക് വിദേശ കാര്യമന്ത്രാലയ വക്താവ് പറഞ്ഞു.
അഹമ്മദ് പട്ടേലിനെ ഗുജറാത്ത് മുഖ്യമന്ത്രിയാക്കണമെന്ന് പാകിസ്താന്‍ കരസേനാ മുന്‍മേധാവി അര്‍ശദ് റഫീഖ് ആവശ്യപ്പെട്ടുവെന്നായിരുന്നു മോദിയുടെ ആരോപണം. ഇതുമായി ബന്ധപ്പെട്ട് കോണ്‍ഗ്രസ് നേതാവ് മണിശങ്കര്‍ അയ്യരുടെ വസതിയില്‍ പാക് ഉന്നതരും കോണ്‍ഗ്രസ് നേതാക്കളും മൂന്നുമണിക്കൂര്‍ നീണ്ടുനിന്ന രഹസ്യ ചര്‍ച്ച നടത്തിയിരുന്നുവെന്നും മോദി ആരോപിച്ചിരുന്നു.