ന്യൂഡല്‍ഹി: ചാനലിന് നല്‍കിയ അഭിമുഖത്തിലൂടെ തെരഞ്ഞെടുപ്പ് പെരുമാറ്റച്ചട്ട ലംഘനം നടത്തിയെന്ന് ആരോപിച്ച് രാഹുലിനെതിരേ പുറപ്പെടുവിച്ച നോട്ടിസ് തെരഞ്ഞെടുപ്പ് കമ്മിഷന്‍ പിന്‍വലിച്ചു. ഗുജറാത്തിലെ രണ്ടാംഘട്ട വോട്ടെടുപ്പിനിടെ പ്രാദേശിക ചാനലിന് അഭിമുഖം നല്‍കിയതിനാണ് രാഹുലിനെതിരേ നോട്ടിസ് പുറപ്പെടുവിച്ചത്.
എന്നാല്‍ തെരഞ്ഞെടുപ്പ് കമ്മിഷന്റെ നടപടിക്കെതിരേ കോണ്‍ഗ്രസ് പ്രതിഷേധവുമായി രംഗത്തെത്തിയിരുന്നു. സമാന രീതിയില്‍, പെരുമാറ്റച്ചട്ടം നിലനില്‍ക്കെ പ്രധാനമന്ത്രി നരേന്ദ്ര മോദിയും ബി.ജെ.പി അധ്യക്ഷന്‍ അമിത് ഷായും ചട്ട ലംഘനം നടത്തിയെന്നും എന്നാല്‍ ഇവര്‍ക്കെതിരേ നടപടിയെടുത്തിട്ടില്ലെന്നും കോണ്‍ഗ്രസ് ആരോപിച്ചിരുന്നു.
രാഹുലിനെതിരേയുള്ള ആരോപണം പരിശോധിക്കാനായി പ്രത്യേക കമ്മിറ്റിയെ തെരഞ്ഞെടുപ്പ് കമ്മിഷന്‍ ചുമതലപ്പെടുത്തി. ഈ കമ്മിറ്റിയുടെ റിപ്പോര്‍ട്ടനുസരിച്ചായിരിക്കും തുടര്‍നടപടികള്‍.