മുക്കം: പൂര്‍വ വിദ്യാര്‍ഥി- അധ്യാപക സംഗമത്തോടനുബന്ധിച്ച് മാതൃവിദ്യാലയത്തിന് പൂര്‍വ വിദ്യാര്‍ഥികള്‍ നിര്‍മിച്ചു നല്‍കുന്ന ഭീമന്‍ സ്ലേറ്റും പെന്‍സിലും കൗതുകമാകുന്നു.
91 വര്‍ഷം പിന്നിട്ട പന്നിക്കോട് ഗവണ്‍മെന്റ് എല്‍.പി സ്‌കൂളില്‍ ശനിയാഴ്ച പൂര്‍വ വിദ്യാര്‍ഥികളും അധ്യാപകരും ഒത്തുചേരുന്നതിനോടനുബന്ധിച്ചാണ് 91 ചെറിയ സ്ലേറ്റുകളുടെ വലിപ്പമുള്ള ഭീമന്‍സ്ലേറ്റും പെന്‍സിലും പൂര്‍വ വിദ്യാര്‍ഥികളായ രാജേഷ് കളക്കുടികുന്ന്, സുനില്‍ കളക്കുടികുന്ന് എന്നിവര്‍ ചേര്‍ന്ന് നിര്‍മിച്ചത്.
220 സെന്റിമീറ്റര്‍ നീളവും 149 സെന്റിമീറ്റര്‍ വീതിയുമുള്ള സ്ലേറ്റിന് ഒരു ക്വിന്റലോളം ഭാരവുമുണ്ട്. 127 സെന്റിമീറ്റര്‍ നീളമുള്ള പെന്‍സിലിന് 22 സെന്റിമീറ്റര്‍ വണ്ണമുണ്ട്. മരവും മൈക്കയുമാണ് ഭീമന്‍ സ്ലേറ്റ് നിര്‍മിക്കുന്നതിനായി ഉപയോഗിച്ചത്. പെന്‍സിലിനായി പ്ലാസ്റ്റര്‍ ഓഫ് പാരീസ്, സിമന്റ്, സ്‌റ്റൈനര്‍ എന്നിവയുടെ പ്രത്യേക കൂട്ട് രാജേഷ് തന്നെ കണ്ടു പിടിച്ചതാണ്. സാധാരണ സ്ലേറ്റും പെന്‍സിലും പോലെ എഴുതാന്‍ പറ്റും എന്നതും ഇതിന്റെ പ്രത്യേകതയാണ്.
ഒരാഴ്ചയോളം നീണ്ടു നിന്ന പരിശ്രമത്തിലൂടെയാണ് രാജേഷും സുനിലും ഇതിന്റെ നിര്‍മാണം പൂര്‍ത്തീകരിച്ചത്. പൂര്‍വ വിദ്യാര്‍ഥി സംഗമത്തിന്റെ ഓര്‍മക്കായി ഈ ഭീമന്‍ സ്ലേറ്റ് സ്‌കൂളിന് സമ്മാനിക്കും. സംഗമത്തിന്റെ ഭാഗമായി രണ്ടു ക്ലാസ് മുറികളും പൂര്‍വ വിദ്യാര്‍ഥികള്‍ ഡിജിറ്റല്‍ ചെയ്ത് നല്‍കും.