ഇലക്കറികള്‍ ദിവസവും ഭക്ഷണത്തില്‍ ഉള്‍പ്പെടുത്താന്‍ തയ്യാറാണോ? എങ്കില്‍ തലച്ചോറിന്റെ പ്രായം കുറയ്ക്കാം. പച്ച നിറത്തിലുള്ള ഇലക്കറികളും സാലഡും കഴിക്കുന്നത് മറവി രോഗം അകറ്റാനം ഓര്‍മ്മശക്തി മെച്ചപ്പെടുത്താനും സാധിക്കും. യു.എസിലെ റഷ് സര്‍വകലാശലയിലെ ഗവേഷകരാണ് ഇതു സംബന്ധിച്ച് പഠനം നടത്തിയത്. ദിവസവും ഇലക്കറികള്‍ കഴിക്കുന്നത് തലച്ചോറിനെ പതിനൊന്ന് വര്‍ഷം വരെ ചെറുപ്പമാക്കുമെന്നാണ് ഗവേഷകര്‍ പറയുന്നത്. അല്‍സ്‌ഹൈമേഴ്‌സ്, മേധാക്ഷയം മുതലായവയുടെ ലക്ഷണങ്ങളെ കുറയ്ക്കുവാനും പച്ചക്കറികള്‍ക്ക് ആവുമത്രേ. 

ശരാശരി 81 വയസ് പ്രായമുള്ള 960 പേരിലാണ് പഠനം നടത്തിയത്. മറവി രോഗം ബാധിക്കാത്ത ഇവരില്‍ ഏകദേശം 4 വര്‍ഷത്തോളം പഠനം നടത്തി. ഭക്ഷണ ക്രമീകരണത്തേക്കുറിച്ചും കഴിക്കുന്ന ഭക്ഷണങ്ങളെ കുറിച്ചും ചോദ്യാവലിയും മറ്റും തയ്യാറാക്കി. പഠന കാലയളവില്‍ ഓരോ വര്‍ഷവും ഇവരുടെ ചിന്തയും ഓര്‍മശക്തിയും പരിശോധിച്ചു വിലയിരുത്തി.

വേവിക്കാത്ത പച്ചക്കറികളും ഇലക്കറികളും ദിവസവും കഴിക്കുന്നതും വിലയിരുത്തി. വലപ്പോഴും മാത്രം ഇലക്കറികള്‍ കഴിക്കുന്നവരെയും ഇവ ഒട്ടും കഴിക്കാത്തവരെയും അപേക്ഷിച്ച് എല്ലാ ദിവസവും ഒരു തവണയെങ്കിലും ഇലക്കറികള്‍ കഴിക്കുന്നവരില്‍ ചിന്താശക്തിയും ഓര്‍മശക്തിയും കൂടുതലുള്ളതായി കണ്ടു. ഇലക്കറികള്‍ കഴിക്കുന്നവരുടെ തലച്ചോറിന് 11 വര്‍ഷം പ്രായക്കുറവ് ഉള്ളതായി ന്യൂറോളജി ജേണലില്‍ പ്രസിദ്ധീകരിച്ച പഠനം പറയുന്നു. തലച്ചോറിന്റെ ആരോഗ്യത്തെ ബാധിക്കുന്ന പുകവലി, ഉയര്‍ന്ന രക്തസമ്മര്‍ദം, പൊണ്ണത്തടി, ശാരീരിക പ്രവര്‍ത്തനങ്ങള്‍ തുടങ്ങിയ ഘടകങ്ങള്‍ കണക്കിലെടുത്തപ്പോഴും പഠനഫലം മാറ്റമില്ലാത്ത തുടര്‍ന്നു.

മറവിരോഗം ബാധിക്കുന്ന പ്രായമായവരുടെ എണ്ണം വര്‍ധിക്കുന്ന കാലഘട്ടത്തില്‍ ഫലപ്രദമായ മാര്‍ഗങ്ങളിലൂടെ രോഗത്തെ തടയാന്‍ സാധിക്കുമെന്ന പഠനങ്ങള്‍ കാലഘട്ടത്തിന്റെ അനിവാര്യതയാണ്. അതുകൊണ്ടു തന്നെ പ്രായമാകലിനെയും മറവിരോഗത്തെയും തടയാന്‍ ഇലക്കറികളും പച്ചക്കറികലും സാലഡും ശീലമാക്കാം.