അലിസ്റ്റര്‍ കുക്കിന്റെ ഗംഭീര തിരിച്ചു വരവില്‍ ഇംഗ്ലണ്ട് ടീം വന്‍ നാണക്കേടില്‍ നിന്നാണ് രക്ഷപ്പെട്ടത്. ഏറെക്കാലമായി മികച്ച ബാറ്റിങ് പ്രകടനം പുറത്തെടുക്കാന്‍ സാധിക്കാതിരുന്ന കുക്ക് കരിയറിലെ 151ാം ടെസ്റ്റില്‍ റെക്കോര്‍ഡുകളുടെ അകമ്പടിയോടെയാണ് മെല്‍ബണില്‍ തന്റെ ക്ലാസ് പുറത്തെടുത്തത്. മെല്‍ബണ്‍ ക്രിക്കറ്റ് മൈതാനത്ത് ഒരു സന്ദര്‍ശക ബാറ്റ്‌സ്മാന്‍ നേടുന്ന ഏറ്റവും ഉയര്‍ന്ന സ്‌കോറായി കുക്കിന്റെ 244 മാറി. നേരത്തെ 1984ല്‍ വെസ്റ്റിന്ത്യന്‍ ഇതിഹാസം വിവിയന്‍ റിച്ചാര്‍ഡ്‌സ് നേടിയ 208 റണ്‍സാണ് വഴിമാറിയത്. മെല്‍ബണില്‍ ഒരു ഇംഗ്ലീഷ് ബാറ്റ്‌സ്മാന്‍ നേടുന്ന ഏറ്റവും ഉയര്‍ന്ന സ്‌കോറിന്റെ റെക്കോര്‍ഡും കുക്ക് സ്വന്തമാക്കി.
1928ല്‍ വാല്ലി ഹമ്മോണ്ട് നേടിയ 200 റണ്‍സാണ് പഴങ്കഥയായത്. ടെസ്റ്റില്‍ ഏറ്റവും കൂടുതല്‍ റണ്‍സെടുത്ത ബാറ്റ്‌സ്മാന്‍മാരുടെ പട്ടികയില്‍ കുക്ക് ആറാം സ്ഥാനത്തേക്ക് കയറി. ആറാമതുണ്ടായിരുന്നു വെസ്റ്റിന്ത്യന്‍ വിസ്മയം ബ്രയാന്‍ ലാറയെയാണ് മുന്‍ ഇംഗ്ലീഷ് നായകന്‍ പിന്തള്ളിയത്. 11956 റണ്‍സാണ് കുക്കിന്റെ ടെസ്റ്റിലെ സമ്പാദ്യം.