കായിക മേഖലയിലെ ഏറ്റവും ഉയർന്ന പുരസ്കാരം.

ദുബൈ: യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ നാമധേയത്തിലുള്ള അന്താരാഷ്ട്ര കായിക വ്യക്തിത്വത്തിനുള്ള പുരസ്കാരം ഫിഫ പ്രസിഡന്റ് ജിയാനി ഇൻഫാന്റിനോയ്ക്ക് സമ്മാനിച്ചു. ഈ പുരസ്കാരം കായിക മേഖലയിലെ ഏറ്റവും വലുതാണെന്ന് ഇൻഫാന്റിനോ പറഞ്ഞു. ദുബൈയിൽ നടന്ന മുഹമ്മദ് ബിൻ റാഷിദ് അൽ മക്തൂം ക്രിയേറ്റീവ് സ്‌പോർട്‌സ് അവാർഡിന്റെ 12-ാമത് എഡിഷനിൽ പുരസ്‌കാരം ലഭിച്ചതിൽ അഭിമാനിക്കുന്നുവെന്ന് അവാർഡ് സ്വീകരിച്ചു കൊണ്ട് അദ്ദേഹം അഭിപ്രായപ്പെട്ടു.
ഈ ബഹുമതി ഏറ്റവും ഉയർന്നതാണെന്ന് ഇന്റർനാഷണൽ ഫെഡറേഷൻ ഓഫ് അസോസിയേഷൻ ഫുട്‌ബോൾ (ഫിഫ) സ്ഥിരീകരിചു റിപ്പോർട്ട് പ്രസിദ്ധീകരിച്ചു. കായിക രംഗത്തെ പദവി ഉയർത്തുകയും ന്യായമായ മത്സരം പ്രോത്സാഹിപ്പിക്കുകയും ചെയ്യുന്ന മുൻനിര വ്യക്തികൾക്കു നൽകുന്ന ഈ പുരസ്കാരം പ്രശംസനീയമെന്നും റിപ്പോർട്ടിൽ ചൂണ്ടിക്കാട്ടി. കായിക രംഗത്ത് അഭിനിവേശമുള്ള ശൈഖ് മുഹമ്മദ് ബിൻ റാഷിദ് അൽ മക്തൂമിൽ നിന്ന് പ്രചോദനം ഉൾക്കൊണ്ട പേഴ്സണാലിറ്റി അവാർഡ് മാതൃകാപരമാണെന്നും ഇൻഫാന്റിനോയുടെ അവാർഡ് നേട്ടത്തെക്കുറിച്ച് ഫിഫ പ്രസിദ്ധീകരിച്ച റിപ്പോർട്ടിൽ വിശദീകരിച്ചു. വിവിധ കായിക മേഖലകളിലെ വ്യക്തിഗത നേട്ടങ്ങളെ ആദരിക്കുകയെന്ന ലക്ഷ്യത്തോടെ 2009-ൽ ആരംഭിച്ചതാണ് ഈ അവാർഡ്. 2012-ൽ രാജ്യാന്തര താരങ്ങളെ പുരസ്കാരത്തിന് നാമനിർദ്ദേശം ചെയ്യാൻ അനുവദിക്കുന്ന തരത്തിൽ വ്യവസ്ഥയിൽ മാറ്റം വരുത്തി.
“കായിക ലോകത്തെ സർഗ്ഗാത്മകത, പുതുമ, നീതി എന്നിവയെ ആഘോഷിക്കുന്ന ഈ അവാർഡ് ലഭിക്കുന്നത് എന്നിൽ അഭിമാനം നിറയ്ക്കുന്നു. കാരണം, ഫിഫയിൽ ഞങ്ങൾ ഐക്യം, ന്യായമായ മത്സരം, സമത്വം, സുസ്ഥിരമായ ആഗോള വികസനം എന്നിവയെ പ്രതിനിധീകരിക്കുന്നു. എല്ലാ അവാർഡ് ജേതാക്കളെയും അഭിനന്ദിക്കുകയും ചെയ്യുന്നു'' -ശൈഖ് മുഹമ്മദ് അവാർഡിന്റെ ബോർഡ് ഓഫ് ട്രസ്റ്റി ചെയർമാൻ മത്തർ അൽ തായർ പറഞ്ഞു.
ഫിഫ ബീച്ച് സോക്കർ ലോക കപ്പ് ഫെബ്രുവരി 15 മുതൽ ദുബൈയിലാണ് നടക്കുക.
നാല് ഫിഫ ക്ലബ് ലോക കപ്പുകൾ, 2003ലെ ഫിഫ അണ്ടർ 20 ലോക കപ്പ്, 2013 ലെ ഫിഫ അണ്ടർ 17 ലോക കപ്പ്, കൂടാതെ കഴിഞ്ഞ 21 വർഷത്തിനിടെ എട്ട് ടൂർണമെന്റുകൾക്ക് ആതിഥേയത്വം, ഫിഫ ബീച്ച് സോക്കർ വേൾഡ് കപ്പ് 2009 അങ്ങനെ നിരവധി ഫിഫ ടൂർണമെന്റുകളുടെ അഭിമാന ചരിത്രമാണ് യുഎഇക്കുള്ളതെന്ന് ഫിഫ പറഞ്ഞു. ഫിഫ ബീച്ച് സോക്കർ വേൾഡ് കപ്പ് 2024 അടുത്ത മാസം ആരംഭിക്കുമ്പോൾ അതിന്റെ ഒമ്പതാമത് ഫിഫ ടൂർണമെന്റിന് കൂടിയാണ് ആതിഥേയത്വം വഹിക്കപ്പെടുക.