ഖത്തറില്‍ തടവിലായിരുന്ന എട്ട് ഇന്ത്യന്‍ നാവികര്‍ക്ക് മോചനം; മോചിതരായവരില്‍ മലയാളിയും

ദോഹ: ഖത്തറില്‍ തടവിലായിരുന്ന മുന്‍ ഇന്ത്യന്‍ നാവികര്‍ക്ക് മോചനം. ചാരവൃത്തി കേസില്‍ തടവിലായിരുന്ന മലയാളിയുള്‍പ്പെടെ എട്ട് പേരെയാണ് ഖത്തര്‍ മോചിപ്പിച്ചത്. ഖത്തറിന്റെ നടപടിയില്‍ ഇന്ത്യന്‍ വിദേശകാര്യ മന്ത്രാലയം നന്ദി അറിയിച്ചു. നേരത്തെ വധശിക്ഷക്ക് വിധിക്കപ്പെട്ടവരാണിവര്‍ പിന്നീട് നയതന്ത്ര ഇടപെടലുകളുടെ ഭാഗമായി ശിക്ഷ ഇളവ് ചെയ്തിരുന്നു.

ക്യാപ്റ്റന്‍ നവ്‌തേജ് സിങ് ഗില്‍, ക്യാപ്റ്റന്‍ ബിരേന്ദ്ര കുമാര്‍ വര്‍മ, ക്യാപ്റ്റന്‍ സൗരഭ് വസിഷ്ഠ്, കമാന്‍ഡര്‍ അമിത് നാഗ്പാല്‍, കമാന്‍ഡര്‍ സുഗുണാകര്‍ പകാല, കമാന്‍ഡര്‍ സഞ്ജീവ് ഗുപ്ത, തിരുവനന്തപുരം സ്വദേശിയെന്നുകരുതുന്ന നാവികന്‍ രാഗേഷ് ഗോപകുമാര്‍ എന്നിവരായിരുന്നു ശിക്ഷ നേരിട്ടത്. ഇന്ത്യന്‍ നാവികസേനയില്‍നിന്ന് വിരമിച്ചശേഷം ഖത്തറിലെ സ്വകാര്യകമ്പനിയായ അല്‍ ദഹ്‌റയില്‍ ജോലിചെയ്യവേ 2022 ഓഗസ്റ്റിലാണ് ഇവര്‍ അറസ്റ്റിലായത്.

2023 മാര്‍ച്ചില്‍ നടന്ന വിചാരണയ്ക്കുശേഷം ഒക്ടോബര്‍ 26നായിരുന്നു ഇവര്‍ക്ക് വധശിക്ഷ വിധിച്ചത്. അതേസമയം, രഹസ്യസ്വഭാവമുള്ള നടപടിക്രമങ്ങളായതിനാല്‍ വിഷയത്തില്‍ കൂടുതല്‍ കാര്യങ്ങള്‍ വിദേശകാര്യമന്ത്രാലയം വ്യക്തമാക്കിയിരുന്നില്ല.

18മാസത്തെ ജയില്‍ വാസത്തിന് ശേഷം ഏഴു പേര്‍ ഇന്ത്യയിലേക്ക് തിരിച്ചു.