റിയാദ്: സഊദിയിൽ കാറുകൾ കൂട്ടിയിടിച്ച് ഒരു കുടുംബത്തിലെ ആറു പേർ മരണപ്പെട്ടു. പടിഞ്ഞാറൻ സഊദിയിലെ തബൂക്കിലെ മദീന റോഡിൽ തിങ്കളാഴ്ചയാണ് ദാരുണമായ ദുരന്തമുണ്ടായത്. മൂന്ന് കാറുകൾ കൂട്ടിയിടിച്ചുണ്ടായ അപകടത്തിൽ ഒരു കാറിലുണ്ടായിരുന്ന ആറു പേരാണ് മരണപ്പെട്ടത്. ഒരേ കുടുംബത്തിലെ മൂന്ന് പെൺകുട്ടികളും നാല് യുവാക്കളുമാണ് മരണപ്പെട്ടത്.

     ഇവരിൽ മൂന്ന് പേർ സഹോദരങ്ങളാണ്. അപകടത്തിൽ മറ്റൊരു കാറിലെ മൂന്ന് പേർക്ക് പരിക്കേൽക്കുകയും ചെയ്‌തിട്ടുണ്ട്‌. അറബ് വംശജരായ ഇവരുടെ പരിക്ക് ഗുരുതരമാണ്. അതേസമയം, മൂന്നാമത്തെ കാറിലുണ്ടായിരുന്നവർക്ക് സാരമായ പരിക്കേറ്റിട്ടില്ല. സംഭവ സ്ഥലത്തെത്തിയ റെഡ് ക്രസന്റ്, സിവിൽ ഡിഫൻസ്, പോലീസ് സേനകൾ രക്ഷാ പ്രവർത്തനം നടത്തി പരിക്കേറ്റവരെ കിംഗ് ഖാലിദ് ആശുപത്രിയിൽ പ്രവേശിപ്പിച്ചു.