ഛണ്ഡിഗഢ്: ബി.ജെ.പിയില്‍നിന്നു രാജിവച്ച മുന്‍ ക്രിക്കറ്റ് താരവും മുന്‍ എം.പിയുമായ നവജ്യോത് സിങ് സിദ്ധുവിന്റെ എ.എ.പി പ്രവേശനം അനിശ്ചിതത്വത്തില്‍. സ്വാതന്ത്ര്യദിനത്തില്‍ സിദ്ധു എ.എ.പിയില്‍ ചേരുമെന്നാണ് വാര്‍ത്തകള്‍ പുറത്തുവന്നിരുന്നതെങ്കിലും അതുണ്ടായില്ല.
പഞ്ചാബില്‍ നടക്കാനിരിക്കുന്ന നിയമസഭാ തെരഞ്ഞെടുപ്പില്‍ സിദ്ധു എ.എ.പി സ്ഥാനാര്‍ഥിയായി മത്സരിക്കുമെന്നും ഭരണം കിട്ടിയാല്‍ മുഖ്യമന്ത്രിയാകുമെന്നുമായിരുന്നു അഭ്യൂഹം. എന്നാല്‍ വിഷയത്തില്‍ ഇതുവരെ സിദ്ധു മനസ് തുറന്നിട്ടില്ല. ഓഗസ്റ്റ് 12ന് എ.എ.പി നേതാവും ഡല്‍ഹി മുഖ്യമന്ത്രിയുമായ അരവിന്ദ് കെജ്‌രിവാളിനെ സന്ദര്‍ശിച്ച സിദ്ധു, പഞ്ചാബിലെ മുഖ്യമന്ത്രി സ്ഥാനാര്‍ഥിയാക്കണമെന്ന നിര്‍ദേശം മുന്നോട്ടുവച്ചതായും വാര്‍ത്തയുണ്ടായിരുന്നു. സംഭവത്തില്‍ എ.എ.പി ഔദ്യോഗികമായി പ്രതികരിച്ചിട്ടില്ല. എന്നാല്‍, സിദ്ധുവിനെ കോണ്‍ഗ്രസ് പാര്‍ട്ടിയിലേക്കു ക്ഷണിച്ചിട്ടുണ്ടെന്നാണ് സൂചന. എ.എ.പിയില്‍ കിട്ടുന്നതിനേക്കാള്‍ പരിഗണന നല്‍കാമെന്നും കോണ്‍ഗ്രസ് വാഗ്ദാനം ചെയ്തിട്ടുണ്ട്.
അതേസമയം, പഞ്ചാബിലെ ജനങ്ങള്‍ക്കാവശ്യം നാടകമല്ല, വികസനമാണെന്നു ചൂണ്ടിക്കാട്ടി ബി.ജെ.പി രംഗത്തെത്തിയിട്ടുണ്ട്.