വാഷിങ്ടണ്‍: യു.എസ് വൈസ് പ്രസിഡന്റായി ഇന്ത്യന്‍ വംശജ കമല ഹാരിസ് സത്യപ്രതിജ്ഞ ചൊല്ലി അധികാരമേറ്റു. പ്രൗഢ ഗംഭീരമായ ചടങ്ങിലാണ് സത്യപ്രതിജ്ഞാ ചടങ്ങ് നടന്നത്. കാപിറ്റോളില്‍ അതീവ സുരക്ഷയോടെ ചുരുങ്ങിയ ആളുകളെ മാത്രം പങ്കെടുപ്പിച്ചാണ് സത്യപ്രതിജ്ഞാ ചടങ്ങ്.

Read more: ആദ്യ ഇന്ത്യക്കാരി, ആദ്യ കറുത്തവര്‍ഗക്കാരി; കമലാ ഹാരിസ് യു.എസ് വൈസ് പ്രസിഡന്റാകുമ്പോള്‍ മാറുന്ന ചരിത്രം

ചടങ്ങില്‍ പ്രസിഡന്റ് സ്ഥാനത്തു നിന്നിറങ്ങിയ ഡൊണാള്‍ഡ് ട്രംപ് പങ്കെടുത്തില്ലെങ്കിലും അദ്ദേഹത്തിന്റെ വൈസ് പ്രസിഡന്റ് മൈക്ക് പെന്‍സ് സംബന്ധിച്ചു. മുന്‍ പ്രസിഡന്റുമാരായ ബരാക് ഒബാമ, ബില്‍ ക്ലിന്‍ണ്‍, ജോര്‍ ബുഷ് എന്നിവരും ചടങ്ങില്‍ പങ്കെടുത്തു.

യു.എസിലെ ആദ്യത്തെ ഹിസ്പനിക് സുപ്രിം കോടതി ജസ്റ്റിസ് സോണിയ സോട്ടമേയറാണ് കമല ഹാരിസിന് സത്യവാചകം ചൊല്ലിക്കൊടുത്തത്. സുപ്രിംകോടതി ചീഫ് ജസ്റ്റിസ് ജോണ്‍ റോബട്‌സാണ് ബൈഡന് സത്യവാചകം ചൊല്ലിക്കൊടുത്തത്.

ചരിത്രത്തില്‍ ആദ്യമായാണ് യു.എസില്‍ ഒരു വനിത വൈസ് പ്രസിഡന്റുണ്ടാവുന്നത്. ആദ്യത്തെ കറുത്തവര്‍ഗക്കാരിയെന്ന ചരിത്രവും ഇന്ത്യക്കാരിയെന്ന വിശേഷണവും കമലയ്ക്കു തന്നെ. അമേരിക്കയില്‍ അധികാരത്തിലേറുന്ന ഏറ്റവും പ്രായം കൂടിയ പ്രസിഡന്റാണ് ജോ ബൈഡന്‍.

സാധാരണ സത്യപ്രതിജ്ഞാ ചടങ്ങ് ലക്ഷങ്ങള്‍ സംബന്ധിച്ചാണ് നടക്കാറുള്ളത്. അക്രമങ്ങളുടെയും കൊവിഡിന്റെയും പശ്ചാത്തലത്തില്‍ 1000 ആളുകളെ മാത്രം പങ്കെടുപ്പിച്ചാണ് ഇപ്രാവശ്യത്തെ ചടങ്ങ്.

ട്രംപിന് നല്‍കിയ യാത്രയയപ്പ് ചടങ്ങ് ഉപേക്ഷിച്ചാണ് മൈക്ക് പെന്‍സ് ബൈഡന്റെ ചടങ്ങില്‍ പങ്കെടുത്തത്.