റിയാദ്: സഊദിയിൽ കൊവിഡ് പ്രതിരോധ നടപടികൾ എന്ന് മുതൽ ലഘൂകരിക്കുമെന്ന സൂചന നൽകി ആരോഗ്യ മന്ത്രാലയം. ആരോഗ്യ മന്ത്രാലയ അണ്ടർ സെക്രട്ടറി ഡോ: ഹാനി ജോഖ്ദാർ ആണ് ഇത് സംബന്ധിച്ച സൂചന നൽകിയത്. ഈ വർഷം മൂന്നാം പാദം അവസാനത്തോടെ അഥവാ സെപ്തംബർ അവസാനത്തോടെ പ്രതിരോധ നടപടികളിൽ അയവ് വരുത്താൻ സാധിക്കുമെന്നാണു ഇദ്ദേഹം നൽകുന്ന സൂചന. എംബിസി ടെലിവിഷന്റെ പ്രത്യേക ആഴ്ച്ച പരിപാടിയിൽ സംസാരിക്കുകയായിരുന്നു ആരോഗ്യ മന്ത്രാലയ അണ്ടർ സെക്രട്ടറി ഡോ: ഹാനി ജോഖ്ദാർ

    ഇതേ സമയം ആകുമ്പോഴത്തേക്ക് പ്രതിരോധ ശേഷി വർധിപ്പിക്കുന്ന നടപടികൾ ലക്ഷ്യമിട്ടതിലും കവിയുമെന്നും അദ്ദേഹം പറഞ്ഞു. വാക്‌സിൻ ലഭ്യതക്കുറവ് മൂലം രാജ്യത്ത് വാക്‌സിൻ വിതരണം ആഴ്ച്ചയിൽ അര മില്യണ് താഴെയാണ്. നിലവിൽ ആഴ്ച്ചതോറും ഒരു ലക്ഷം വാക്സിനുകളാണു ഫൈസർ കമ്പനി സഊദിയിൽ എത്തിക്കുന്നതെന്നും അദ്ദേഹം പറഞ്ഞു.

     അതേസമയം, ഫൈസർ വാക്‌സിൻ ലഭ്യതക്കുറവ് മൂലം രാജ്യത്ത് വാക്‌സിൻ വിതരണത്തിൽ മാറ്റങ്ങൾ വരുത്തിയിട്ടുണ്ട്. നേരത്തെ വാക്‌സിൻ വിതരണത്തിന് രജിസ്റ്റർ ചെയ്‌തവരിൽ സ്വീകരിക്കാനായി സന്ദേശം ലഭിച്ചവർക്ക് തിയ്യതികളിൽ മാറ്റം വരുമെന്നും ഒന്നാം ഘട്ട ഡോസ് സ്വീകരിക്കാനായി സന്ദേശം ലഭിച്ചവർക്കും രജിസ്റ്റർ ചെയ്‌തവർക്കും കാല താമസം ഉണ്ടാകുമെന്നും മന്ത്രാലയം അറിയിച്ചിട്ടുണ്ട്. വാക്‌സിൻ ലഭ്യതക്കുറവ് മൂലം ആദ്യ ഡോസ് സ്വീകരിച്ചവർക്ക് രണ്ടാം ഡോസും നൽകുന്നതിനാണ് ഇപ്പോൾ മുൻഗണന നൽകുന്നത്.