ഇന്ത്യൻ‌ സൂപ്പർ‌ ലീഗിൽ‌ കേരള ബ്ലാസ്റ്റേഴ്സിനു സീസണിലെ രണ്ടാം തോൽവി. ബംഗളൂരു എഫ്സിക്കെതിരെ ഏകപക്ഷീയമായ ഒരു ഗോളിനാണു ബ്ലാസ്റ്റേഴ്സ് തോറ്റത്. 56–ാം മിനിറ്റിൽ നവോറം റോഷൻ സിങ്ങാണ് ബംഗളൂരുവിനായി ഗോൾ നേടിയത്. ബ്ലാസ്റ്റേഴ്സ് ക്യാംപിൽ കോവിഡ് പടർന്നു പിടിച്ചതിന്റെ ആലസ്യം കളിയിലാകമാനം കാണാമായിരുന്നു.

ടീം മത്സരത്തിനു തയാറായിട്ടില്ലെന്ന് പരിശീലകൻ ഇവാൻ വുകുമാനോവിച്ച് മത്സരത്തിനു മുൻപുള്ള വാർത്താ സമ്മേളനത്തിൽ പറഞ്ഞിരുന്നു. ബ്ലാസ്റ്റേഴ്സിനു ഗോളവസരങ്ങൾ‌ പലതു ലഭിച്ചിരുന്നെങ്കിലും മുന്നേറ്റനിരയിലെ പ്രശ്നങ്ങൾ തിരിച്ചടിയായി. ഗോൾ രഹിതമായ ആദ്യ പകുതിക്കുശേഷം രണ്ടാം പകുതിയിൽ ബെംഗളൂരു ലീഡെടുത്തു. മറുപടി ഗോളിനായി ബ്ലാസ്റ്റേഴ്സ് കിണഞ്ഞു പരിശ്രമിച്ചെങ്കിലും പരാജയപ്പെട്ടുപോകുകയായിരുന്നു. ആദ്യ മത്സരത്തിൽ ബ്ലാസ്റ്റേഴ്സ് എടികെ മോഹൻബഗാനോട് 4–2ന് തോറ്റിരുന്നു.

 ജയത്തോടെ ബംഗളൂരു എഫ്.സി നാലാം സ്ഥാനത്ത് എത്തി. ബ്ലാസ്റ്റേഴ്‌സ് മൂന്നാം സ്ഥാനത്ത് തുടരുകയാണ്. തുടര്‍ച്ചയായ പത്തുമത്സരങ്ങളില്‍ തോല്‍ക്കാതെ ബെംഗളൂരുവിനെതിരെ കളിക്കാനിറങ്ങിയ മഞ്ഞപ്പടയ്ക്ക് പിഴക്കുകയായിരുന്നു. മത്സരം തുടങ്ങിയപ്പോള്‍ തൊട്ട് ബ്ലാസ്‌റ്റേഴ്‌സ് തനത് ശൈലിയില്‍ ആക്രമിച്ച് കളിച്ചെങ്കിലും ഒന്നും ലക്ഷ്യത്തിലെത്തിക്കാനായില്ല. ഗോൾ രഹിതമായ ആദ്യ പകുതിക്കുശേഷം രണ്ടാം പകുതിയിലാണ് ബംഗളൂരു ലീഡെടുത്തത്. തകര്‍പ്പന്‍ കിക്കിലൂടെ പന്ത് വലയിലെത്തിച്ചായിരുന്നു റോഷന്റെ ഗോള്‍. റോഷന്റെ സീസണിലെ ആദ്യ ഗോളാണിത്. അതേസമയം ഇരു ടീമുകള്‍ക്കും 20 പോയിന്റാണ് ഉള്ളത്. എന്നാൽ ബംഗളൂരു എഫ്.സി പതിനാല് മത്സരങ്ങൾ പൂർത്തിയാക്കിയപ്പോൾ ബ്ലാസ്റ്റേഴ്‌സിന്റേത് 12 മത്സരങ്ങളായിട്ടുള്ളൂ. കോവിഡ് കാരണം ബ്ലാസ്റ്റേഴ്‌സിന്റെ രണ്ട് മത്സരങ്ങളാണ് മാറ്റിവെച്ചത്.