ചെയർമാനെ മാറ്റണമെന്ന് സി.ഐ.ടി.യു
അതൃപ്തി അറിയിച്ച് എം.എം മണിയും
സ്വന്തം ലേഖകൻ
തിരുവനന്തപുരം
കെ.എസ്.ഇ.ബി ചെയർമാൻ ഡോ. ബി അശോകും സി.ഐ.ടി.യു നേതൃത്വത്തിലുള്ള യൂനിയനും തമ്മിലുള്ള പോര് പുതിയ തലത്തിലേക്ക്. ചെയർമാൻ അധികാര ദുർവിനിയോഗം നടത്തി കെ.എസ്.ഇ.ബിക്ക് സാമ്പത്തിക ദുർവ്യയമുണ്ടാക്കുന്നുവെന്നാരോപിച്ച് ഇടതു യൂനിയനുകൾ കഴിഞ്ഞ ദിവസം പട്ടത്തെ വൈദ്യുതിഭവൻ ആസ്ഥാനത്ത് അനിശ്ചിതകാല പ്രക്ഷോഭം ആരംഭിച്ചിരുന്നു. ചെയർമാൻ അധികാര ദുർവിനിയോഗം നടത്തി പുറത്തിറക്കിയ ഉത്തരവുകൾ പിൻവലിക്കുന്നതുവരെ പ്രക്ഷോഭം തുടരുമെന്നാണ് സമരസമിതിയുടെ നിലപാട്. കഴിഞ്ഞ സർക്കാരിന്റെ കാലത്ത് ഇടതു യൂനിയനുകളാണ് അധികാര ദുർവിനിയോഗവും സാമ്പത്തിക ദുർവ്യയവും നടത്തിയതെന്ന് കെ.എസ്.ഇ.ബിയുടെ ഫേസ്ബുക്ക് പേജിലൂടെ ചെയർമാൻ തിരിച്ചടിച്ചതോടെയാണ് വിവാദം തുടങ്ങിയത്. മുൻ മന്ത്രി എം.എം മണിയും നിലവിലത്തെ മന്ത്രി കെ. കൃഷ്ണൻകുട്ടിയും പരസ്യമായി പ്രതികരിച്ചതോടെ വിവാദത്തിന് ആക്കം കൂടി.എം.എം മണി വൈദ്യുതി മന്ത്രിയായിരുന്ന കാലത്ത് ഇടതു യൂനിയനുകൾ ബോർഡിന് കോടികളുടെ ബാധ്യതയുണ്ടാക്കുന്ന തീരുമാനത്തിന് കൂട്ടുനിന്നുവെന്നാണ് ചെയർമാൻ സമൂഹമാധ്യമ പേജിൽ പ്രധാന ആക്ഷേപം ഉന്നയിച്ചത്. എന്നാൽ ചെയർമാന്റെ ആരോപണങ്ങൾക്കു പിന്നിൽ രാഷ്ട്രീയമെന്നാണ് ഇടത് യൂനിയൻ നേതാക്കളുടെ പ്രതികരണം. രാഷ്ട്രീയ താൽപര്യമുണ്ടെങ്കിൽ രാജിവയ്ക്കണമെന്ന് ഓഫിസേഴ്‌സ് അസോസിയേഷൻ ആവശ്യപ്പെട്ടു. ചെയർമാൻ സ്ഥാനത്തുനിന്ന് ബി അശോകിനെ മാറ്റണമെന്ന് ആവശ്യപ്പെട്ട് സി.ഐ.ടി.യു സി.പി.എം നേതൃത്വത്തെ സമീപിച്ചു. എം.എം മണിയും തന്റെ അതൃപ്തി സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനെയും മുഖ്യമന്ത്രി പിണറായി വിജയനെയും അറിയിച്ചിട്ടുണ്ട്.അതേസമയം, ചെയർമാന്റെ കുറിപ്പിൽ അന്വേഷണം നടത്താനും സമരം ചെയ്യുന്ന കെ.എസ്.ഇ.ബി സംഘടനകളുമായി ചർച്ച ചെയ്യാനും സർക്കാർ തീരുമാനിച്ചു. നാളെ ഉച്ചയ്ക്ക് രണ്ടിന് മന്ത്രി കെ. കൃഷ്ണൻകുട്ടിയുടെ ഔദ്യോഗിക വസതിയിലാണ് ചർച്ച. ഊർജ വകുപ്പ് സെക്രട്ടറിയായിരിക്കും അശോകിന്റെ കുറിപ്പിൽ അന്വേഷണം നടത്തുക.