ഇന്നത്തെ ദിവസത്തിനൊരു പ്രത്യേകതയുണ്ട്. എന്താണെന്നറിയില്ലേ. ഇടക്കുള്ള വരയും കുറിയുമൊക്കെ ഒന്നു മാറ്റിപ്പിടിച്ചാല്‍ തിരിച്ചു വായിച്ചാലും മറിച്ചു വായിച്ചാലും ഒരുപോലെ. 22022022.

ഇത്തരം സംഖ്യകള്‍ക്ക് ഒരു ചെല്ലപ്പേരുമുണ്ട്. ഇരുദിശകളിലേക്കും വായിച്ചാല്‍ മാറ്റമില്ലാത്ത സംഖ്യകളാണ് ഇരുദിശ സംഖ്യകള്‍ (പാലിന്‍ഡ്രോം).

വ്യത്യസ്ത ദിശയില്‍നിന്ന് നോക്കിയാലും ഒരേ അര്‍ഥത്തില്‍ 22022022നെ വായിക്കാനാകുമെന്നതും പ്രത്യകതയാണ്. ഇതിനെ ആംബിഗ്രാം എന്നുവിളിക്കുന്നു. അതായത് കണ്ണാടിയില്‍ നോക്കിയാല്‍ കാണുന്നതും (ഡിജിറ്റല്‍ സ്‌റ്റൈലില്‍) ഒരുപോലെ. സാധാരണ നിലക്ക് കണ്ണാടിയില്‍ വാക്കുകങ്ങള്‍ തലതിരിഞ്ഞല്ലേ കാണുക. വായിക്കാനും സാധിക്കില്ല. ഏതായാലും അപൂര്‍വങ്ങളില്‍ അപൂര്‍വമായ ഇത്തരം തീയതി ഇനി വരണമെങ്കില്‍ കാലങ്ങള്‍ കാത്തിരിക്കണം.

പാലിന്‍ഡ്രോം
ഇരുദിശകളിലേക്കും വായിച്ചാല്‍ മാറ്റമില്ലാത്ത സംഖ്യകളാണ് പാലിന്‍ഡ്രോം. 373, 4554, 14941 തുടങ്ങിയവയെല്ലാം ഇരുദിശ സംഖ്യകളാണ്. ഇങ്ങനെ ഇരുദിശകളിലേക്കും വായിക്കാവുന്ന വാക്കുകളുമുണ്ട്. madam, malayalam, racecar തുടങ്ങിയവ ഉദാഹരണം. 100നും 200നും ഇടയില്‍ 10 ഇരുദിശ സംഖ്യകളുണ്ട്. 101,111, 121, 131, 141, 151, 161, 171, 181,191 ഇവയാണ് സംഖ്യകള്‍. ചില സംഖ്യകളുടെ വര്‍ഗങ്ങള്‍ ഇരുദിശ സംഖ്യകളാണെന്നു കാണാം.

അംബിഗ്രാം
വ്യത്യസ്ത ദിശയില്‍ നിന്ന് നോക്കിയാല്‍ ഒരേ അര്‍ഥം ലഭിക്കുന്ന രീതിയില്‍ വാക്കുകള്‍ കലാരൂപത്തില്‍ എഴുതുന്നതിനെ അംബിഗ്രാം എന്ന് പറയും. 1969ല്‍ ഫ്രഞ്ച് വംശജനായ അമേരിക്കന്‍ ഇന്‍ഡസ്ട്രിയല്‍ ഡിസൈനര്‍ റെയ്മണ്ട് ലോവി ഇംഗ്ലീഷില്‍ എഴുതിയ ന്യൂ മാന്‍ (NEW MAN) അംബിഗ്രാം ഇപ്പോഴും ഉപയോഗിച്ചുവരുന്നു.