HOME
DETAILS

'യുദ്ധ കാഹളം'; ഉക്രൈനില്‍ സൈനിക നടപടിക്ക് ഉത്തരവിട്ട് റഷ്യ; ഇടപെട്ടാല്‍ ഗുരുതര പ്രത്യാഘാതമെന്ന് മറ്റ് രാജ്യങ്ങള്‍ക്ക് പുടിന്റെ മുന്നറിയിപ്പ്

  
backup
February 24 2022 | 03:02 AM

world-putin-announces-military-operation-in-ukraine

മോസ്‌കോ: ഉക്രൈനെതിരെ യുദ്ധം പ്രഖ്യാപിച്ച് റഷ്യ. സൈനിക നടപടിക്ക് പ്രസിഡന്റ് വ്‌ളാദിമര്‍ പുടിന്‍ ഉത്തരവിട്ടു. ഇടപെട്ടാല്‍ ഗുരുതര പ്രത്യാഘാതമെന്ന് മറ്റ് രാജ്യങ്ങള്‍ക്ക് പുടിന്‍ മുന്നറിയിപ്പ് നല്‍കുന്നു.

ഉക്രൈനിലെ ഡോണ്‍ബാസ് മേഖലയിലേക്ക് കടക്കാന്‍ സൈന്യത്തിന് നിര്‍ദേശം നല്‍കി. മേഖലയില്‍ ഉക്രൈന്റെ ആക്രമണമുണ്ടാകുന്നുവെന്നാണ് റഷ്യയുടെ ആരോപണം. അതിന് തടയിടാന്‍ സൈനിക നടപടി വേണമെന്നും പുടിന്‍ പറയുന്നു. ആയുധം താഴെവെക്കണമെന്നും പുടിന്‍ ഉക്രൈനോട് ആവശ്യപ്പെട്ടു.

രക്തചൊരിച്ചില്‍ ഒഴിവാക്കാന്‍ ആയുധംവെച്ച് കീഴടങ്ങാന്‍ ഉക്രൈയ്ന്‍ സൈനികരോട് പുടിന്‍ ആവശ്യപ്പെട്ടു. രാജ്യത്തിന് പുറത്ത് സൈനിക വിന്യാസം നടത്താന്‍ കഴിഞ്ഞ ദിവസം റഷ്യന്‍ പാര്‍ലമെന്റ് പുടിന് അനുമതി നല്‍കിയിരുന്നു.

അതേസമയം, യുദ്ധനീക്കത്തില്‍ നിന്ന് പിന്മാറണമെന്ന് യുഎന്‍ സെക്രട്ടറി ജനറല്‍ അന്റോണിയോ ഗുട്ടറസ് ആവശ്യപ്പെട്ടു. സാഹചര്യം കൂടുതല്‍ അപകടകരമായി മാറിയതിനാല്‍ യു.എന്‍ സുരക്ഷാസമിതിയുടെ അടിയന്തര യോഗം ചേരുകയാണ്. ഉക്രൈയ്ന്‍ ഐക്യരാഷ്ട്ര സഭയുടെ സഹായം തേടിയിട്ടുണ്ട്.

റഷ്യന്‍ സൈന്യം ഉക്രെന്‍ അതിര്‍ത്തിയിലേക്ക് കൂടുതല്‍ അടുത്ത സാഹചര്യത്തില്‍ നേരത്തെ ത്‌നെ പ്രസിഡന്റ് വൊളോദിമിര്‍ സെലന്‍സ്‌കി രാജ്യത്ത് അടിയന്തരാവസ്ഥ പ്രഖ്യാപിച്ചിരുന്നു. രാജ്യത്തെ അഭിസംബോധന ചെയ്തു കൊണ്ടാണ് വൊളോദിമിര്‍ സെലന്‍സ്‌കി യുദ്ധകാല അടിയന്തരാവസ്ഥ പ്രഖ്യാപിച്ചത്.

റഷ്യന്‍ സൈന്യം അതിര്‍ത്തി കടന്നാല്‍ സര്‍വശക്തിയുമെടുത്ത് പ്രതിരോധിക്കുമെന്ന് വൊളോദിമിര്‍ സെലന്‍സ്‌കി മുന്നറിയിപ്പ് നല്‍കുകയും ചെയ്തിരുന്നു. രണ്ട് ലക്ഷത്തോളം വരുന്ന റിസര്‍വ് സൈനികര്‍ സൈനിക സേവനത്തിനായി തയാറായിരിക്കണമെന്ന് സെലന്‍സ്‌കി നിര്‍ദേശം നല്‍കി. 18-60 പ്രായക്കാരോട് സൈന്യത്തില്‍ ചേരാനും പ്രസിഡന്റ് ആവശ്യപ്പെട്ടിട്ടുണ്ട്.



Comments (0)

Disclaimer: "The website reserves the right to moderate, edit, or remove any comments that violate the guidelines or terms of service."