പയ്യന്നൂര്‍: മമ്പലത്ത് പൂട്ടിയിട്ട വീട്ടില്‍ കവര്‍ച്ച. മമ്പലം ക്ഷേത്രം റെയില്‍വെ സ്റ്റേഷന്‍ റോഡില്‍ കൊവ്വല്‍ പടോളി ലക്ഷ്മണന്റെ പൂട്ടിയിട്ട വീടിന്റെ വാതിലുകളും അലമാരകളും കുത്തി തുറന്നാണ് കവര്‍ച്ച നടന്നത്.
അലമാരയില്‍ സൂക്ഷിച്ച 17,500 രൂപ മോഷണം പോയി. അകത്തെ ബെഡ്‌റൂമിന്റെ വാതില്‍ തകര്‍ത്ത് അകത്തു കടന്ന മോഷ്ടാക്കള്‍ തൊട്ടടുത്ത മുറികളിലെ അലമാര തകര്‍ത്ത് വസ്ത്രങ്ങളും മറ്റും വാരിവലിച്ചിട്ട നിലയിലാണ്. മുംബൈയില്‍ എന്‍ജിനീയറിങ് കമ്പനിയില്‍ ജോലി ചെയ്യുന്ന ലക്ഷ്മണനും കുടുംബവും കഴിഞ്ഞ പതിനൊന്നിനാണ് തിരിച്ചു പോയത്.
കഴിഞ്ഞ ദിവസം വീടിന്റെ മുന്‍വശത്തെ വാതിലുകള്‍ തുറന്നിട്ട നിലയില്‍  ബന്ധുക്കള്‍ കണ്ടതിനെത്തുടര്‍ന്ന് ലക്ഷ്മണനെ വിവരമറിയിക്കുകയായിരുന്നു.
ഇദ്ദേഹം നാട്ടിലെത്തി പരിശോധിച്ചപ്പോഴാണ് പണം നഷ്ടപ്പെട്ടതായി മനസിലായത്. പയ്യന്നൂര്‍ പൊലിസ് കേസെടുത്ത് അന്വേഷണം ആരംഭിച്ചു.