കാക്കനാട്:  ഇനി ഉഷ്ണകാലത്ത് യാത്രക്കാര്‍ക്ക് വിയര്‍ത്ത് നില്‍ക്കേണ്ട. കൊച്ചിയിലെ ആദ്യ എ.സി ബസ് കാത്തിരിപ്പ് കേന്ദ്രം കൊച്ചി കലക്ടറേറ്റ് ബസ് സ്റ്റോപ്പില്‍ ഒരുങ്ങുന്നു. ജില്ലാ പഞ്ചായത്തും ജില്ലാ സഹകരണ ബാങ്കും ചേര്‍ന്നാണ് പദ്ധതി യാഥാര്‍ഥ്യമാക്കിയത്. ജില്ലാ പഞ്ചായത്തിന്റെ സ്ഥലത്ത് 25 വര്‍ഷം ജില്ലാ സഹകരണ ബാങ്കിന് അവകാശം നല്‍കിയാണ് കാത്തിരുപ്പ് കേന്ദ്രം ബാങ്ക് നിര്‍മിച്ചിരിക്കുന്നന്നത്.
കാത്തിരുപ്പ് കേന്ദ്രത്തോടനുബന്ധിച്ച് ജില്ലാ ബാങ്കിന്റെ എ.ടി.എം സ്ഥാപിക്കാനും ബാങ്കിന്റെ ഡിജിറ്റല്‍ പരസ്യം പ്രദര്‍ശിപ്പിക്കാനും മാത്രമാണ് അനുമതി. 10 പേര്‍ക്ക് ഇരിക്കാന്‍ സൗകര്യമുള്ള ബസ് കാത്തിരുപ്പ് കേന്ദ്രമാണ് നിര്‍മിച്ചിട്ടുള്ളതെന്ന് ജില്ലാ പഞ്ചായത്ത് പ്രസിഡന്റ് ആശാ സനില്‍ പറഞ്ഞു.
ടി.വി, കുടിവെള്ളം, പത്രങ്ങള്‍, റേഡിയോ, എ.ടി.എം, വൈഫൈ, നിരീക്ഷണ ക്യാമറ എന്നിവ കാത്തിരുപ്പ് കേന്ദ്രത്തിലുണ്ടാകും. കലക്ടറേറ്റിനും ജില്ലാ പഞ്ചായത്തിനും ഇടയിലുള്ള റോഡിലെ ബസ് സ്റ്റോപ്പ് 30 മീറ്റര്‍ മാറ്റി ജില്ലാ പഞ്ചായത്ത് വളപ്പിലാണ് എ.സി കാത്തിരുപ്പ് കേന്ദ്രം. ഈ മാസ അവസാനം ഉദ്ഘാടനം നിര്‍വഹിക്കുമെന്ന് അധികൃതര്‍ പറഞ്ഞു.