അമരാവതി
അറുപത്തഞ്ചുകാരന്റെ മൃതദേഹം തോളിലേറ്റി കാട്ടിലൂടെ മൂന്ന് കിലോമീറ്റർ സഞ്ചരിച്ച വനിതാ എസ്.ഐക്ക് അഭിനന്ദന പ്രവാഹം. ആന്ധ്രാപ്രദേശിലെ പ്രകാശം ജില്ലയിൽ ഹന്മന്തുണിപേട്ട് മണ്ഡലിലാണ് സംഭവം. വനിതാ എസ്.ഐ കൃഷ്ണ പവാനിയാണ് പ്രശംസ പിടിച്ചുപറ്റിയത്.
കാട്ടിനുള്ളിൽ അജ്ഞാത മൃതദേഹം കണ്ടെത്തിയതായി നാട്ടുകാർ വിവരമറിയിച്ചതിനെ തുടർന്നാണ് പൊലിസ് സംഭവസ്ഥലത്തെത്തിയത്. എന്നാൽ, മൃതദേഹം ചുമക്കാൻ മറ്റുള്ളവർ തയാറാകാതെ വന്നതോടെ കൃഷ്ണ ധൈര്യപൂർവം ദൗത്യം ഏറ്റെടുക്കുകയായിരുന്നു. പോസ്റ്റ്‌മോർട്ടം നടപടികൾക്കായി കനിഗിരിയിലുള്ള ആശുപത്രിയിലേക്ക് മാറ്റാനാണ് മൃതദേഹം വനത്തിൽ നിന്ന് പുറത്തെത്തിച്ചത്. ദുർഘടമായ കാട്ടുവഴിയിലൂടെ കനത്ത ചൂടും അവഗണിച്ചാണ് കൃഷ്ണ ഭാരവും ചുമന്ന് നടന്നത് . കൃഷ്ണയോടൊപ്പം കോൺസ്റ്റബിളും കൂടെ ഉണ്ടായിരുന്നു.