പുൽപള്ളി: അർബുദ ബാധിതനായ കർഷകൻ ഭൂദാനം നടുക്കുടിയിൽ കൃഷ്ണൻകുട്ടിയുടെ(70) മരണം വിവാദത്തിൽ. കൃഷ്ൺകുട്ടി ആത്മഹത്യ ചെയ്തത് ബാങ്കിന്റെ ജപ്തി ഭീഷണിയെത്തുടർന്നാണെന്നു ബന്ധുക്കൾ ആരോപിച്ചു. വിഷം അകത്തുചെന്ന നിലയിൽ കർണാടകയിലെ ബൈരക്കുപ്പയിൽ കണ്ടെത്തിയ കഴിഞ്ഞ ദിവസം മാനന്തവാടി ഗവ.മെഡിക്കൽ കോളജ് ആശുപത്രിയിലാണ് മരിച്ചത്.

സഹകരണ സ്ഥാപനത്തിൽനിന്നു കൃഷ്ണൻകുട്ടി 2013ൽ ഒരു ലക്ഷം രൂപ വായ്പ എടുത്തിരുന്നു. രണ്ടു വർഷം പലിശ അടച്ചു പുതുക്കിയെങ്കിലും പിന്നീട് കൃഷികൾ നശിച്ചതിനാൽ വായ്പ തിരിച്ചടവ് നടന്നില്ല. ജപ്തി നടപടികൾ ആരംഭിക്കുമെന്നു കാണിച്ച് ബാങ്ക് അടുത്തിടെ പല തവണ നോട്ടീസ് അയച്ചിരുന്നു. ഇതിനു പുറമേ നിയമോപദേശകനെ കൂട്ടി ബാങ്ക് ജീവനക്കാർ വീട്ടിലെത്തിയും ജപ്തി ഭീഷണി മുഴക്കിയതായും കുടുംബാംഗങ്ങൾ പറയുന്നു. കൃഷ്ണൻകുട്ടി 2014ൽ ഭാര്യയുടെ പേരിൽ മറ്റൊരു സഹകരണ ബാങ്കിൽനിന്നെടുത്ത 13,500 രൂപയുടെ വായ്പയും കുടിശികയാണ്.

ഭാര്യ വിലാസിനിയും മനോജ്, പ്രിയ എന്നീ മക്കളും അടങ്ങുന്നതാണ് കുടുംബം.