വടകര: മാഹിയില്‍ നിന്ന് കാറില്‍ കടത്തുകയായിരുന്ന 210 കുപ്പി വിദേശമദ്യം വടകര എക്‌സൈസ് പിടികൂടി. സംഭവത്തില്‍ അഴിയൂര്‍ മരുന്നലക്കല്‍ പടിഞ്ഞാറ് ഷഫീഖ് (20), അഴിയൂര്‍ മയലക്കര അബൂബക്കര്‍ സിദ്ദീഖ് (24) എന്നിവരെ അറസ്റ്റ് ചെയ്തു. ഇന്നലെ വൈകിട്ട് മൂന്നോടെയാണ് വടകര പുതിയ ബസ് സ്റ്റാന്‍ഡിനും എടോടിക്കും ഇടയില്‍ വച്ച് 12 കെയ്‌സുകളിലായി ഇന്‍ഡിഗോ കാറില്‍ കടത്തുകയായിരുന്ന വിദേശമദ്യം പിടികൂടിയത്.
വില്ല്യാപ്പള്ളി ഭാഗത്തേക്കായിരുന്നു മദ്യം കടത്തിയതെന്ന് എക്‌സൈസ്  സംഘം പറഞ്ഞു. പ്രത്യേക വിവരം ലഭിച്ചതിനെ തുടര്‍ന്ന് എക്‌സൈസ് സംഘം വാഹനത്തെ പിന്തുടര്‍ന്ന് മദ്യം പിടികൂടുകയായിരുന്നു. എക്‌സൈസ് ഇന്‍സ്‌പെക്ടര്‍ ഷാജി ജോര്‍ജ്ജിന്റെ നേതൃത്വത്തിലുള്ള സംഘമാണ് മദ്യക്കടത്ത് പിടികൂടിയത്.
അസിസ്റ്റന്റ് ഇന്‍സ്‌പെക്ടര്‍മാരായ ഹേമന്ദ്കുമാര്‍, പി. സുരേന്ദ്രന്‍, സി.ഇ.ഒമാരായ ഗണേഷ്, സുഷാന്ത്, സജീവന്‍ എന്നിവരും സംഘത്തിലുണ്ടായിരുന്നു.